മെൽബൺ: ഓസ്ട്രേലിയൻ സംസ്ഥാനമായ വിക്ടോറിയയുടെ പുതിയ പ്രീമിയറായി ബെൻ കരോൾ (Ben Carroll MP) ചുമതലയേറ്റു. വിക്ടോറിയൻ ലേബർ പാർട്ടിയുടെ പുതിയ നേതാവായി തിരഞ്ഞെടുക്കപ്പെട്ടതിന് പിന്നാലെയാണ് അദ്ദേഹം ഔദ്യോഗികമായി അധികാരമേറ്റത്. സംസ്ഥാന രാഷ്ട്രീയത്തിൽ നിർണ്ണായക മാറ്റങ്ങൾക്ക് വഴിയൊരുക്കുന്നതാണ് ഈ പുതിയ നേതൃമാറ്റം.
ഔദ്യോഗികമായി സ്ഥാനമേറ്റെടുത്ത ശേഷം പുറത്തുവിട്ട ആദ്യ വീഡിയോ പ്രസ്താവനയിൽ, ജനങ്ങളുടെ മാറ്റത്തിനുള്ള ആഗ്രഹത്തെ താൻ പൂർണ്ണമായും അംഗീകരിക്കുന്നതായി അദ്ദേഹം വ്യക്തമാക്കി.
“വിക്ടോറിയയിലെ ജനങ്ങൾ വളരെ വ്യക്തമായി സൂചിപ്പിച്ചിരിക്കുന്നത്, ഞങ്ങളുടെ സർക്കാർ ഇനി പുതിയ ദിശയിലേക്ക് സഞ്ചരിക്കണമെന്നാണ്. നിങ്ങളുടെ പ്രീമിയർ എന്ന നിലയിൽ, ആ പുതിയ ദിശാബോധം ഞാൻ വിക്ടോറിയയ്ക്ക് നൽകും” – ബെൻ കരോൾ പ്രസ്താവനയിലൂടെ ഉറപ്പുനൽകി.
വരാനിരിക്കുന്ന നവംബറിലെ സംസ്ഥാന തിരഞ്ഞെടുപ്പ് മുന്നിൽ കണ്ട്, വിക്ടോറിയൻ സർക്കാരിനെയും ഭരണനയങ്ങളെയും ബെൻ കരോൾ എങ്ങനെ ഉടച്ചുവാർക്കും എന്നതിലേക്കാണ് ഇപ്പോൾ രാഷ്ട്രീയ കേന്ദ്രങ്ങൾ ഉറ്റുനോക്കുന്നത്.
