കൊച്ചി: മുഖ്യമന്ത്രി വി.ഡി. സതീശനെതിരെ വ്യാജ രണ്ടാം വിവാഹ ആരോപണം ഉന്നയിച്ചെന്ന കേസിൽ റിപ്പോർട്ടർ ബ്രോഡ്കാസ്റ്റിങ് കമ്പനി എം.ഡി. ആന്റോ അഗസ്റ്റിന് കളമശേരി പൊലീസ് വീണ്ടും നോട്ടീസ് നൽകി. നാളെ രാവിലെ 10 മണിക്ക് കളമശേരി സ്റ്റേഷനിൽ ചോദ്യം ചെയ്യലിന് എത്താനാണ് അന്വേഷണസംഘം നിർദേശിച്ചിരിക്കുന്നത്. കേസിൽ ആന്റോ അഗസ്റ്റിന് പൊലീസ് നൽകുന്ന രണ്ടാമത്തെ നോട്ടീസാണിത്.
നേരത്തെ ചോദ്യം ചെയ്യലിന് വിളിപ്പിച്ചപ്പോൾ, ഒക്ടോബർ 15 കഴിഞ്ഞേ ഹാജരാകാൻ സാധിക്കൂ എന്ന് ആന്റോ അഗസ്റ്റിൻ അറിയിച്ചിരുന്നെങ്കിലും പൊലീസ് ഈ ആവശ്യം തള്ളുകയായിരുന്നു. നിശ്ചയിച്ച സമയത്ത് ചോദ്യം ചെയ്യലിന് എത്തിയില്ലെങ്കിൽ, തുടർനടപടികൾക്കായി കോടതിയിൽ റിപ്പോർട്ട് നൽകാനാണ് അന്വേഷണ സംഘത്തിന്റെ തീരുമാനം.
കെ.പി.സി.സി. വക്താവ് രാജു പി. നായർ നൽകിയ പരാതിയുടെ അടിസ്ഥാനത്തിലാണ് കേസ്. പത്തനംതിട്ടയിൽ സംഘടിപ്പിച്ച ഒരു പൊതുപരിപാടിക്കിടെ, മുഖ്യമന്ത്രി മറ്റൊരു വിവാഹം കഴിച്ചതായുള്ള വിവരങ്ങളും ബൈന്ദൂർ സബ് രജിസ്ട്രാർ ഓഫീസിലെ വിവാഹരേഖകളും തന്റെ കൈവശമുണ്ടെന്ന് ആന്റോ അഗസ്റ്റിൻ പ്രസ്താവിച്ചിരുന്നു. എന്നാൽ ഈ രേഖകൾ വ്യാജമായി ചമച്ചതാണെന്നും മുഖ്യമന്ത്രിയുടെ പ്രതിച്ഛായ തകർക്കാൻ ലക്ഷ്യമിട്ടുള്ള ഗൂഢാലോചനയാണിതെന്നും പരാതിയിൽ ആരോപിക്കുന്നു.
ആരോപണത്തിന് ആധാരമായ രേഖകളുടെ ഉറവിടം, ഇവ ആന്റോ അഗസ്റ്റിനിലേക്ക് എത്തിയ വഴി, ഇതിന് പിന്നിൽ മറ്റ് വ്യക്തികൾക്ക് പങ്കുണ്ടോ തുടങ്ങിയ കാര്യങ്ങളാണ് പൊലീസ് പ്രധാനമായും പരിശോധിക്കുന്നത്. സംഭവത്തിൽ കണ്ടാലറിയാവുന്ന മറ്റ് രണ്ട് പേരെയും കേസിൽ പ്രതികളാക്കിയിട്ടുണ്ട്.
