ന്യൂഡൽഹി: കിഴക്കൻ ലഡാക്കിൽ അതിർത്തിയിലേക്കുള്ള റോഡ് ബന്ധം കൂടുതൽ ശക്തമാക്കാൻ ഇന്ത്യ. ദർബുക്–ഷ്യോക്–ദൗലത് ബേഗ് ഓൾഡി (DS-DBO) റോഡിന്റെ കിഴക്കൻ കരയിലൂടെ 150 കിലോമീറ്റർ ദൈർഘ്യമുള്ള റോഡ് നിർമാണത്തിനുള്ള വിശദമായ പദ്ധതി റിപ്പോർട്ട് (DPR) തയ്യാറാക്കുന്നതിനായി അതിർത്തി റോഡ് ഓർഗനൈസേഷൻ (BRO) ടെൻഡർ ക്ഷണിച്ചിട്ടുണ്ട്. 2026–27 സാമ്പത്തിക വർഷത്തേക്കുള്ള ടെൻഡർ നടപടിയാണ് നിലവിലുള്ളത്.
ഷ്യോക് നദിയുടെ കിഴക്കൻ കരയിലൂടെ നിർമിക്കുന്ന റോഡ് പുതിയ മാനദണ്ഡങ്ങൾക്കനുസരിച്ച് വികസിപ്പിക്കാനാണ് പദ്ധതി. 150 കിലോമീറ്റർ ഭാഗം അഞ്ച് പാക്കേജുകളായാണ് DPR തയാറാക്കുന്നത്. കിഴക്കൻ ലഡാക്കിലെ തന്ത്രപ്രധാന മേഖലകളിലേക്കുള്ള സൈനിക-ലോജിസ്റ്റിക് ഗതാഗതം മെച്ചപ്പെടുത്തുന്നതിന് ഈ പാത സഹായകമാകുമെന്നാണ് വിലയിരുത്തൽ.
ലഡാക്കിൽ അതിർത്തി അടിസ്ഥാന സൗകര്യ വികസനത്തിന് BRO വിവിധ പദ്ധതികൾ നടപ്പാക്കിവരികയാണ്. ഹനുത്താങ്–തുര്‍തുക് റോഡ്, ഹാംബോട്ടിങ് ലാ തുരങ്കം, ഖൽത്സെ–ബറ്റാലിക് റോഡ് വീതികൂട്ടൽ തുടങ്ങിയ പദ്ധതികളുടെ DPR തയ്യാറാക്കുന്നതും പുരോഗമിക്കുന്നുണ്ട്.
കിഴക്കൻ ലഡാക്കിൽ നേരത്തെയും റോഡ്, പാലം, തുരങ്കം തുടങ്ങിയ അടിസ്ഥാന സൗകര്യങ്ങളുടെ വികസനം ശക്തമാക്കിയിരുന്നു. DS-DBO റോഡിലെ പാലങ്ങൾ ഉയർന്ന ഭാരശേഷിയിലേക്ക് ഉയർത്തുന്നതിനുള്ള പദ്ധതികളും നടപ്പിലുണ്ട്.
2020ലെ ഇന്ത്യ-ചൈന അതിർത്തി സംഘർഷത്തിന് പിന്നാലെ ലഡാക്കിൽ അടിസ്ഥാന സൗകര്യ വികസനം കൂടുതൽ വേഗത്തിലാക്കിയിരുന്നു. നിലവിലെ റോഡ് പദ്ധതിയും ഈ മേഖലയിലെ ഗതാഗത-അതിർത്തി അടിസ്ഥാന സൗകര്യങ്ങൾ മെച്ചപ്പെടുത്തുന്നതിനുള്ള തുടർനടപടികളുടെ ഭാഗമാണ്.
