മെൽബൺ: ലിൻബ്രൂക്ക് റെസിഡന്റ്സ് അസോസിയേഷൻ സംഘടിപ്പിക്കുന്ന ഈ വർഷത്തെ Lynbrook Lantern Festival ഒക്ടോബർ 10 ശനിയാഴ്ച നടക്കും. സിറ്റി ഓഫ് കേസിയുടെ പിന്തുണയോടെ ലിൻബ്രൂക്ക് റിവർ റെഡ്ഗം പ്ലേസിലുള്ള ബാഞ്ചോ പാറ്റേഴ്സൺ റിസർവിലാണ് ആഘോഷ പരിപാടികൾ അരങ്ങേറുന്നത്. വൈകുന്നേരം 4 മണി മുതൽ രാത്രി 9 മണി വരെയാണ് മേളയുടെ സമയം.
വർണ്ണാഭമായ വിളക്ക് പ്രദർശനങ്ങൾ, ലൈവ് മ്യൂസിക്, ഫുഡ് ട്രക്കുകൾ എന്നിവയ്ക്കൊപ്പം തടാകത്തിന് മുകളിലൂടെ സന്ധ്യാസമയത്ത് നടക്കുന്ന മനോഹരമായ വിളക്ക് തെളിയിക്കലും ഉത്സവത്തിന്റെ പ്രധാന ആകർഷണമായിരിക്കും. കൂടാതെ ചൈനീസ് എൽ.ഇ.ഡി ഡ്രാഗൺ ഡാൻസ്, ചാർലി സില്ലി പാന്റ്സിന്റെ വിനോദ പരിപാടികൾ, ഫയർ ഷോ, കുട്ടികൾക്കായുള്ള റൈഡുകൾ, ഇൻഫ്ലേറ്റബിളുകൾ തുടങ്ങിയ കുടുംബത്തോടൊപ്പം ആസ്വദിക്കാൻ കഴിയുന്ന ഒട്ടേറെ വിനോദങ്ങളും ഒരുക്കിയിട്ടുണ്ട്.
പൊതുജനങ്ങൾക്ക് പ്രവേശനം പൂർണ്ണമായും സൗജന്യമായ ഈ ജനകീയ കൂട്ടായ്മയിലേക്ക് മുഴുവൻ കുടുംബങ്ങളെയും സ്വാഗതം ചെയ്യുന്നതായി സംഘാടകർ അറിയിച്ചു.
