ന്യൂഡൽഹി: ഗ്യാനേഷ് കുമാറിനെതിരായ സി.ജെ.പി സമരം നേരിടുന്നതിന്റെ ഭാഗമായി ഡൽഹി മെട്രോ സർവീസുകളും നഗരത്തിലേക്കുള്ള ട്രെയിനുകളും പൂർണ്ണമായി റദ്ദാക്കുന്നത് സുപ്രീം കോടതി തടഞ്ഞു. ഈച്ചയെ കൊല്ലാൻ ചുറ്റികയുടെ ആവശ്യമില്ലെന്ന് നിരീക്ഷിച്ച കോടതി, ജനങ്ങളെ വലയ്ക്കാത്ത രീതിയിൽ സാഹചര്യങ്ങൾക്കനുസരിച്ച് മാത്രം നിയന്ത്രണങ്ങൾ ഏർപ്പെടുത്തിയാൽ മതിയെന്ന് നിർദ്ദേശിച്ചു. അതേസമയം, മുൻകൂർ അനുമതിയില്ലാതെ നടത്തുന്ന പ്രതിഷേധങ്ങൾ നിയമവിരുദ്ധമാണെന്നും കോടതി വ്യക്തമാക്കി.
സമരത്തിൽ പങ്കെടുക്കാനെത്തുന്നവരെ വിവിധ സംസ്ഥാനങ്ങളിൽ നിന്നായി കസ്റ്റഡിയിലെടുക്കുകയാണെന്ന് സി.ജെ.പിയും ഇടതു സംഘടനകളും ആരോപിച്ചു. സുരക്ഷ ശക്തമാക്കുന്നതിന്റെ ഭാഗമായി ഡൽഹി പൊലീസ് 70 കമ്പനി കേന്ദ്രസേനയെക്കൂടി നഗരത്തിൽ വിന്യസിച്ചിട്ടുണ്ട്. കേന്ദ്ര ആഭ്യന്തരമന്ത്രി അമിത് ഷായുടെ നേതൃത്വത്തിൽ സ്ഥിതിഗതികൾ നിരന്തരം നിരീക്ഷിച്ചു വരികയാണ്.
