വാൻ സാൻഡ് കൗണ്ടി: ശരീഅത്ത് നിയമത്തിനെതിരെ എതിർപ്പ് പ്രഖ്യാപിച്ച് അമേരിക്കയിലെ ടെക്സസ് സംസ്ഥാനത്തുള്ള വാൻ സാൻഡ് കൗണ്ടി പ്രമേയം പാസാക്കി. ഇത്തരമൊരു നിലപാടെടുത്ത് പ്രമേയം പാസാക്കുന്ന ടെക്സസിലെ ആദ്യത്തെ കൗണ്ടിയാണിത്. ബുധനാഴ്ച ചേർന്ന യോഗത്തിൽ കൗണ്ടി കമ്മീഷണർമാർ ഏകകണ്ഠമായാണ് പ്രമേയത്തിന് അംഗീകാരം നൽകിയത്.
കൗണ്ടി പരിധിയിലെ 80 ഏക്കർ ഭൂമി വാങ്ങലുമായി ബന്ധപ്പെട്ട് ഉയർന്ന സാഹചര്യങ്ങളുടെ പശ്ചാത്തലത്തിലാണ് ഭരണസമിതി ഈ നിർണായക തീരുമാനത്തിലേക്ക് എത്തിയത്. യുഎസ് ജനപ്രതിനിധി കീത്ത് സെൽഫ് തയ്യാറാക്കിയ കരട് പ്രമേയത്തിൽ നിന്ന് പ്രചോദനം ഉൾക്കൊണ്ടാണ് ഈ നീക്കം.
യുഎസ് ഭരണഘടനയാണ് രാജ്യത്തെ പരമോന്നത നിയമമെന്നും, ഭരണഘടനയ്ക്ക് അതീതമായ മറ്റൊരു രാഷ്ട്രീയ-നിയമ സംവിധാനവും ഇവിടെ അനുവദിക്കാനാവില്ലെന്നും കൗണ്ടി കമ്മീഷണർമാർ വ്യക്തമാക്കി. അതേസമയം, രാജ്യത്ത് സ്വതന്ത്രമായി ആരാധന നടത്തുന്ന മുസ്ലീം ജനവിഭാഗങ്ങൾക്ക് എതിരല്ല ഈ നടപടിയെന്നും, വ്യക്തിപരമായ മതവിശ്വാസങ്ങളെ പൂർണമായും മാനിക്കുന്നുവെന്നും അധികൃതർ കൂട്ടിച്ചേർത്തു.
