പാരിസ്: ഫ്രാൻസിൽ വർധിച്ചുവരുന്ന ജീവിതച്ചെലവിനും പൊതുസേവന മേഖലയിലെ പ്രതിസന്ധികൾക്കുമെതിരെ ശനിയാഴ്ച നടന്ന പ്രതിഷേധങ്ങൾ അക്രമാസക്തമായി. പ്രതിഷേധത്തിനിടെ മുഖംമൂടി ധരിച്ചെത്തിയവർ തീയിട്ടതിനെത്തുടർന്ന് ലിമോജ് നഗരത്തിലെ 140 വർഷത്തിലേറെ പഴക്കമുള്ള നഗരസഭാ മന്ദിരത്തിന് കനത്ത നാശനഷ്ടമുണ്ടായി. കെട്ടിടത്തിന്റെ മേൽക്കൂരയും മണിമാളികയും തകർന്നുവീണു. കെട്ടിടത്തിന്റെ വലിയൊരു ഭാഗം നഷ്ടപ്പെട്ടതായി അധികൃതർ അറിയിച്ചു.
തലസ്ഥാനമായ പാരിസ് ഉൾപ്പെടെ വിവിധ നഗരങ്ങളിൽ പ്രതിഷേധക്കാർ കടകൾ കൊള്ളയടിക്കുകയും വാഹനങ്ങൾക്കും പൊതുമുതലിനും തീയിടുകയും ചെയ്തു. സംഘർഷങ്ങളെ തുടർന്ന് രാജ്യവ്യാപകമായി 1,200-ലധികം പേരെ അറസ്റ്റ് ചെയ്തതായും 150-ലധികം പോലീസുകാർക്ക് പരിക്കേറ്റതായും റിപ്പോർട്ടുകളുണ്ട്.
വിദ്യാഭ്യാസ മേഖലയിലെ മോശം സാഹചര്യങ്ങൾക്കെതിരെ വിദ്യാർഥികൾ ആരംഭിച്ച പ്രതിഷേധം പിന്നീട് വിലക്കയറ്റം, വാങ്ങൽശേഷിയിലെ കുറവ്, പൊതുസേവനങ്ങളുടെ നിലവാരത്തകർച്ച തുടങ്ങിയ വിഷയങ്ങളിലേക്ക് വ്യാപിക്കുകയായിരുന്നു. തൊഴിലാളി സംഘടനകളും വിവിധ വിഭാഗം ജനങ്ങളും പ്രക്ഷോഭത്തിൽ പങ്കുചേർന്നു.
പ്രതിഷേധത്തിന്റെ ഭാഗമായി നടന്ന അക്രമസംഭവങ്ങളെ ഫ്രഞ്ച് അധികൃതർ അപലപിച്ചു. ജനങ്ങളുടെ പ്രതിഷേധവും അക്രമപ്രവർത്തനങ്ങളും രണ്ടായി കാണണമെന്ന നിലപാടാണ് അധികൃതർ സ്വീകരിച്ചത്. രാജ്യത്തെ വിവിധ നഗരങ്ങളിൽ സംഘർഷം നിയന്ത്രിക്കാനുള്ള നടപടികളും തുടരുകയാണ്.
