കൊൽക്കത്ത: പശ്ചിമ ബംഗാൾ തലസ്ഥാനമായ കൊൽക്കത്തയിൽ ദുർഗാപൂജ പന്തലിലുണ്ടായ തിക്കിലും തിരക്കിലുംപെട്ട് മരിച്ചവരുടെ എണ്ണം 19 ആയി. 25 പേർക്ക് പരിക്കേറ്റു. ശനിയാഴ്ച വൈകുന്നേരം വടക്കൻ കൊൽക്കത്തയിലെ ചോർബഗാൻ സർബോജനീൻ ദുർഗാപൂജ പന്തലിലാണ് അപകടമുണ്ടായത്.
മഴയെ തുടർന്ന് പന്തലിന്റെ പ്രവേശന കവാടത്തിൽ വലിയ തിരക്കുണ്ടായതാണ് അപകടത്തിലേക്ക് നയിച്ചതെന്നാണ് പ്രാഥമിക വിവരം. മഴയിൽനിന്ന് രക്ഷനേടാൻ ആളുകൾ പ്രവേശന ഭാഗത്തേക്ക് ഓടിക്കയറിയതോടെ തിരക്ക് നിയന്ത്രണാതീതമായി. ഇതിനിടെ ആളുകൾ വീണതോടെ തിക്കിലും തിരക്കിലുംപെട്ട് ദുരന്തമുണ്ടാകുകയായിരുന്നു. അപകടത്തിന്റെ കൃത്യമായ കാരണവും സുരക്ഷാ ക്രമീകരണങ്ങളിലെ വീഴ്ചകളും അധികൃതർ പരിശോധിച്ചുവരികയാണ്.
പശ്ചിമ ബംഗാൾ മുഖ്യമന്ത്രി സുവേന്ദു അധികാരി ആശുപത്രിയിലെത്തി പരിക്കേറ്റവരെയും മരിച്ചവരുടെ ബന്ധുക്കളെയും സന്ദർശിച്ചു. സംഭവത്തിൽ പ്രത്യേക അന്വേഷണസംഘത്തെ നിയോഗിക്കുമെന്നും ഉത്തരവാദികളായവർക്കെതിരെ നടപടിയെടുക്കുമെന്നും അദ്ദേഹം അറിയിച്ചു. മരിച്ചവരുടെ കുടുംബങ്ങൾക്ക് 25 ലക്ഷം രൂപ ധനസഹായവും കുടുംബത്തിലെ ഒരാൾക്ക് സർക്കാർ ജോലിയും പ്രഖ്യാപിച്ചു. പരിക്കേറ്റവരുടെ ചികിത്സാച്ചെലവ് സർക്കാർ വഹിക്കുമെന്നും അറിയിച്ചു.
സംഭവത്തെ തുടർന്ന് പന്തലിലേക്കുള്ള പ്രവേശനം നിർത്തിവച്ചു. ദുരന്തത്തിന്റെ പശ്ചാത്തലത്തിൽ തിരക്കേറിയ മറ്റു പൂജാ പന്തലുകളിലെ സുരക്ഷാ ക്രമീകരണങ്ങൾ പരിശോധിക്കാനും അധികൃതർ നിർദേശം നൽകി.
