മുംബൈ: ഇന്ത്യ വിടാൻ നിർദേശിച്ച വിദേശകാര്യ രജിസ്ട്രേഷൻ ഓഫീസിന്റെ (എഫ്ആർആർഒ) ഉത്തരവിനെതിരെ ബോളിവുഡ് നടൻ ഇമ്രാൻ ഖാൻ ബോംബെ ഹൈക്കോടതിയെ സമീപിച്ചു. മുഖ്യ തിരഞ്ഞെടുപ്പ് കമ്മിഷണർ ജ്ഞാനേഷ് കുമാറിന്റെ രാജി ആവശ്യപ്പെട്ട് മുംബൈയിൽ നടന്ന പ്രതിഷേധത്തിൽ പങ്കെടുത്തതിനു പിന്നാലെയാണ് നടനോട് രാജ്യം വിടാൻ നിർദേശിച്ചത്.
ഒക്ടോബർ 14ന് നൽകിയ നോട്ടീസിൽ ഒക്ടോബർ 28നകം ഇന്ത്യ വിടണമെന്നാണ് നിർദേശം. യുഎസ് പൗരനും ഓവർസീസ് സിറ്റിസൺ ഓഫ് ഇന്ത്യ (ഒസിഐ) കാർഡ് ഉടമയുമായ ഇമ്രാൻ ഖാൻ, നടപടി നിയമവിരുദ്ധവും ഏകപക്ഷീയവുമാണെന്ന് ഹർജിയിൽ ആരോപിച്ചു. വിശദമായ കാരണങ്ങൾ അറിയിക്കുകയോ തന്റെ ഭാഗം വിശദീകരിക്കാൻ അവസരം നൽകുകയോ ചെയ്യാതെയാണ് ഉത്തരവ് പുറപ്പെടുവിച്ചതെന്നും ഹർജിയിൽ ചൂണ്ടിക്കാട്ടി.
വോട്ടർപട്ടികയുടെ പ്രത്യേക തീവ്ര പരിഷ്കരണവുമായി (എസ്‌ഐആർ) ബന്ധപ്പെട്ട വിവാദങ്ങളുടെ പശ്ചാത്തലത്തിൽ ഒക്ടോബർ 10ന് മുംബൈയിലെ ആഗസ്റ്റ് ക്രാന്തി മൈതാനത്തിനു സമീപം നടന്ന പ്രതിഷേധത്തിലാണ് നടൻ പങ്കെടുത്തത്. ജ്ഞാനേഷ് കുമാറിന്റെ രാജിയായിരുന്നു പ്രതിഷേധക്കാരുടെ പ്രധാന ആവശ്യം. ഇതിനിടെ നടനെ പൊലീസ് കസ്റ്റഡിയിലെടുത്തിരുന്നു. തുടർന്ന് നടൻ വിദേശ പൗരനാണെന്നും പ്രതിഷേധത്തിൽ പങ്കെടുത്തത് നിയമലംഘനമാണെന്നും ആരോപിച്ച് ബിജെപി നേതാവ് കിരിത് സോമയ്യ പരാതി നൽകി. ഇതിന്റെ അടിസ്ഥാനത്തിലാണ് എഫ്ആർആർഒ നടപടി സ്വീകരിച്ചതെന്നാണ് റിപ്പോർട്ടുകൾ.
അതേസമയം, ഒക്ടോബർ 17ന് എഫ്ആർആർഒ നടന് കാരണം കാണിക്കൽ നോട്ടീസും നൽകി. ഒസിഐ പദവി റദ്ദാക്കാതിരിക്കാനുള്ള കാരണം വ്യക്തമാക്കണമെന്നാണ് നിർദേശം. കേസിൽ കോടതി സ്വീകരിക്കുന്ന തുടർനടപടികൾ നിർണായകമാകും.
