കോട്ടയം: കോട്ടയത്തിന്റെ റെയിൽവേ ചരിത്രത്തിന് ഏഴ് പതിറ്റാണ്ടിന്റെ തിളക്കം. 1956 ഒക്ടോബർ 16-ന് എറണാകുളം–കോട്ടയം മീറ്റർഗേജ് റെയിൽപാത പ്രവർത്തനസജ്ജമായതോടെയാണ് കോട്ടയത്തിന്റെ റെയിൽവേ യാത്രയ്ക്ക് തുടക്കമാകുന്നത്. 2026-ൽ ഈ ചരിത്രനിമിഷത്തിന് 70 വർഷം പൂർത്തിയാവുകയാണ്.
റെയിൽവേയുടെ ആദ്യകാല പരീക്ഷണയോട്ടത്തിന്റെ ഓർമകൾ പങ്കുവയ്ക്കുന്ന അപൂർവമായ പഴയൊരു ചിത്രം ഇപ്പോൾ ചരിത്രകുതുകികൾക്കിടയിൽ ശ്രദ്ധേയമാകുന്നുണ്ട്. അന്നത്തെ റെയിൽവേ വാഹനവും അതിനു ചുറ്റും കൗതുകത്തോടെ ഒത്തുകൂടിയ നാട്ടുകാരും പഴയകാലത്തിന്റെ നേർക്കാഴ്ചയായി ഈ ചിത്രത്തിൽ നിറഞ്ഞുനിൽക്കുന്നു.
റെയിൽവേയുടെ വരവ് കോട്ടയത്തിന്റെ ഗതാഗത, വ്യാപാര, സാമൂഹിക മേഖലകളിൽ വലിയ മാറ്റങ്ങൾക്കാണ് വഴിയൊരുക്കിയത്. യാത്രകൾ എളുപ്പമാക്കിയതിനൊപ്പം വിദ്യാഭ്യാസം, തൊഴിൽ, വ്യാപാരം തുടങ്ങിയ മേഖലകളുടെ വളർച്ചയ്ക്കും റെയിൽവേ വലിയ പങ്കുവഹിച്ചു. ഏഴു പതിറ്റാണ്ടുകൾക്കിപ്പുറം അത്യാധുനിക റെയിൽവേ സംവിധാനങ്ങളിലേക്ക് വളർന്നുനിൽക്കുന്ന കോട്ടയത്തിന്, ഈ പഴയ ചിത്രം ചരിത്രത്തിലേക്കുള്ള ഒരു തിരിഞ്ഞുനോട്ടവും നാടിന്റെ വികസനവഴികളിൽ റെയിൽവേ വഹിച്ച പങ്ക് ഓർമിപ്പിക്കുന്ന വിലപ്പെട്ട ചരിത്രരേഖയുമായി മാറുന്നു.
