കാൻബറ: ഓസ്ട്രേലിയൻ തൊഴിൽമേഖലയിലെ ജനങ്ങൾ അമിത വിദ്യാഭ്യാസ യോഗ്യതയുള്ളവരാണോ എന്ന ചർച്ചകൾ സജീവമാകുന്നതിനിടെ, രാജ്യത്തെ മുതിർന്ന പൗരന്മാരിലെ ഉന്നതവിദ്യാഭ്യാസ യോഗ്യത വർദ്ധിപ്പിക്കാനുള്ള സുപ്രധാന നീക്കവുമായി ഓസ്ട്രേലിയൻ സർക്കാർ. 2050-ഓടെ ഓസ്ട്രേലിയയിലെ പ്രായപൂർത്തിയായവരിൽ 80 ശതമാനം പേരെയും യൂണിവേഴ്സിറ്റി ബിരുദമോ തൊഴിലധിഷ്ഠിത വിദ്യാഭ്യാസ (വൊക്കേഷണൽ) യോഗ്യതയോ ഉള്ളവരാക്കി മാറ്റാനാണ് സർക്കാർ ലക്ഷ്യമിടുന്നത്.
നിലവിൽ രാജ്യത്തെ മുതിർന്നവരിൽ 60 ശതമാനം പേർക്കാണ് ഇത്തരം ഉന്നതവിദ്യാഭ്യാസ യോഗ്യതകളുള്ളത്. ഇത് ഘട്ടഘട്ടമായി ഉയർത്തി എൺപത് ശതമാനത്തിലെത്തിക്കുക എന്ന ലക്ഷ്യത്തോടെയുള്ള വിദ്യാഭ്യാസ നയരൂപീകരണങ്ങൾക്കും പരിഷ്കരണങ്ങൾക്കുമാണ് സർക്കാർ തുടക്കം കുറിക്കുന്നത്. ഭാവിയിലെ തൊഴിൽ വിപണിയുടെ ആവശ്യകത മുൻനിർത്തിയാണ് സർക്കാർ ഈ നീക്കത്തെ പിന്തുണയ്ക്കുന്നതെങ്കിലും, ഇതിനകം തന്നെ വിദ്യാസമ്പന്നരായ ഒരു ജനതയിൽ ഇത്തരമൊരു ഉയർച്ച തൊഴിൽ മേഖലയിലെ യോഗ്യതാ അസന്തുലിതാവസ്ഥയ്ക്ക് വഴിവെക്കുമോ എന്ന തരത്തിലുള്ള ചർച്ചകളും സാമ്പത്തിക-വിദ്യാഭ്യാസ വിദഗ്ദ്ധർക്കിടയിൽ ഉയരുന്നുണ്ട്.
