ടുവൂംബ: കാറോട്ട മത്സരത്തിനിടെ, തീപിടിച്ച കാറിൽ നിന്ന് സഹതാരത്തിന്റെ ജീവൻ രക്ഷിക്കാൻ സ്വന്തം ജീവൻ പണയം വെച്ച ഓസ്ട്രേലിയൻ റേസർ ജെസ്സി അറ്റാർഡിന്റെ ധീരതയ്ക്ക് ലോകമെമ്പാടും പ്രശംസ. ക്വീൻസ്ലൻഡിലെ ടുവൂംബയിൽ നടന്ന ‘തണ്ടർ ഓൺ ദ ഡൗൺസ്’ റേസിംഗിനിടെയാണ് നാടകീയവും മനസ്സിനെ സ്പർശിക്കുന്നതുമായ സംഭവം അരങ്ങേറിയത്.
സിഡ്നിയിൽ നിന്നുള്ള ഡ്രൈവർ മൈക്കൽ സല്ലറുടെ കാർ നിയന്ത്രണം വിട്ട് ഭിത്തിയിലിടിച്ച് തകരുകയും നിമിഷങ്ങൾക്കകം തീപിടിക്കുകയും ചെയ്തു. തീഗോളമായി മാറിയ കാക്പിറ്റിനുള്ളിൽ കുടുങ്ങിപ്പോയ സല്ലർക്ക് പുറത്തിറങ്ങാൻ കഴിയാത്ത അതീവ ഗുരുതരമായ സാഹചര്യമാണ് ഉണ്ടായത്. അപകടം കണ്ടയുടൻ സഹമത്സരാർത്ഥിയായ ജെസ്സി അറ്റാർഡ് ഒട്ടും മടിക്കാതെ കത്തിയെരിയുന്ന കാറിലേക്ക് ഓടിയെത്തുകയായിരുന്നു.
തീജ്വാലകളെ വകവെക്കാതെ കാക്പിറ്റിൽ നിന്ന് സല്ലറെ പുറത്തെടുക്കാൻ അറ്റാർഡ് കിണഞ്ഞു പരിശ്രമിച്ചു. രക്ഷാപ്രവർത്തനത്തിനിടെ ഇരുവരുടെയും ഫയർ റെസിസ്റ്റന്റ് സ്യൂട്ടുകളിലേക്കും തീ പടർന്നുപിടിച്ചു. തുടർന്ന് നിലത്തുകിടന്ന് ഉരുണ്ടാണ് ഇരുവരും ശരീരത്തിലെ തീ അണച്ചത്.
മത്സരവേളയിൽ വെറും എതിരാളികൾ മാത്രമായിരുന്നെങ്കിലും ആ നിർണായക നിമിഷത്തിൽ മത്സരബുദ്ധിയെല്ലാം മാറ്റിനിർത്തി സഹജീവിസ്നേഹമാണ് വലുതെന്ന് അറ്റാർഡ് തെളിയിച്ചു. ജെസ്സിയുടെ ഇടപെടൽ തികച്ചും നിസ്വാർത്ഥമായ പ്രവൃത്തിയാണെന്ന് അപകടത്തിൽ നിന്ന് അത്ഭുതകരമായി രക്ഷപ്പെട്ട സല്ലർ പിന്നീട് പറഞ്ഞു. കാറിനുള്ളിൽ കുടുങ്ങിക്കിടന്ന ആ ഭയാനകമായ നിമിഷങ്ങളിൽ തന്റെ ഭാര്യയുടെയും നവജാതശിശുവിന്റെയും മുഖമായിരുന്നു മനസ്സിൽ തെളിഞ്ഞതെന്നും അദ്ദേഹം വികാരഭരിതനായി പങ്കുവെച്ചു. കായികരംഗത്തെ സ്പോർട്സ്മാൻഷിപ്പിനും അപ്പുറം മനുഷ്യത്വത്തിന്റെയും അസാമാന്യ ധൈര്യത്തിന്റെയും ഉദാത്തമായ മാതൃകയായി മാറിയിരിക്കുകയാണ് ജെസ്സി അറ്റാർഡിന്റെ ഈ ധീരമായ രക്ഷാപ്രവർത്തനം.
