കാൻബെറ: പരിക്കേറ്റ കംഗാരുവിനെ സഹായിക്കാൻ ശ്രമിക്കുന്നതിനിടെ കാറിടിച്ച് കാൻബെറയിലെ പ്രമുഖ മൃഗസംരക്ഷകയും ജീവകാരുണ്യ പ്രവർത്തകയുമായ ജെയ്ൻ ഫൗൾഡർ (60) അന്തരിച്ചു. ന്യൂ സൗത്ത് വെയിൽസിലെ ബ്രെഡ്ബോയ്ക്ക് സമീപം മൊണാരോ ഹൈവേയിലായിരുന്നു ദാരുണമായ അപകടം. റോഡിൽ പരിക്കേറ്റുകിടന്ന കംഗാരുവിനെ രക്ഷിക്കാനായി ഇറങ്ങിയ ജെയ്നിനെ അമിതവേഗതയിൽ എത്തിയ വാഹനം ഇടിച്ചുതെറിപ്പിക്കുകയായിരുന്നു.
അപകടസ്ഥലത്തെത്തിയ പാരാമെഡിക്കൽ സംഘം അടിയന്തര ശുശ്രൂഷകൾ നൽകിയെങ്കിലും അവരുടെ ജീവൻ രക്ഷിക്കാനായില്ല. അപകടത്തിനിടയാക്കിയ കാർ ഓടിച്ചിരുന്ന 54-കാരനായ ഡ്രൈവർ പരിക്കേൽക്കാതെ രക്ഷപ്പെട്ടു. ഇയാളെ നിർബന്ധിത വൈദ്യപരിശോധനകൾക്കായി ആശുപത്രിയിലേക്ക് മാറ്റിയതായി അധികൃതർ വ്യക്തമാക്കി. സംഭവത്തിൽ സമഗ്രമായ അന്വേഷണം ആരംഭിച്ച പോലീസ്, കൊറോണർക്ക് സമർപ്പിക്കുന്നതിനായി റിപ്പോർട്ട് തയ്യാറാക്കിവരികയാണ്.
മൃഗസ്നേഹി, ഫോസ്റ്റർ റെസ്ക്യൂവർ, തിയേറ്റർ ആർട്ടിസ്റ്റ് എന്നീ നിലകളിൽ വ്യക്തിമുദ്ര പതിപ്പിച്ച വ്യക്തിയായിരുന്നു ജെയ്ൻ ഫൗൾഡർ. കാൻബെറയിലെ കാലിസ്തെനിക്സ് കൂട്ടായ്മയിൽ 50 വർഷത്തിലേറെ സജീവ സാന്നിധ്യമായിരുന്ന അവർ സംഘടനയുടെ ലൈഫ് മെമ്പറായും ആദരിക്കപ്പെട്ടിട്ടുണ്ട്. ജെയ്നിന്റെ വേർപാടിൽ കുടുംബാംഗങ്ങൾക്കും സുഹൃത്തുക്കൾക്കും മൃഗസ്നേഹികൾക്കുമൊപ്പം നാടൊന്നാകെ അനുശോചനം രേഖപ്പെടുത്തി. ഇതോടെ, വന്യജീവികൾ സ്ഥിരമായി അപകടത്തിൽപ്പെടുന്ന ഹൈവേകളിൽ കൂടുതൽ ശക്തമായ മുന്നറിയിപ്പ് സംവിധാനങ്ങളും പരിക്കേറ്റ മൃഗങ്ങളെ സഹായിക്കാൻ മുതിരുന്നവർക്ക് കൃത്യമായ സുരക്ഷാ മാർഗ്ഗനിർദ്ദേശങ്ങളും ഏർപ്പെടുത്തണമെന്ന ചർച്ചകൾക്കും ആവശ്യങ്ങൾക്കും വീണ്ടും പ്രാധാന്യമേറുകയാണ്.
