പെർത്ത്: പടിഞ്ഞാറൻ ഓസ്ട്രേലിയയിലെ പ്രശസ്തമായ സിറ്റി ബീച്ചിൽ അടിഞ്ഞ ചത്ത കൂനൻ തിമിംഗലത്തിന്റെ ജഡത്തിന് മുകളിൽ കയറി യുവാവ് വൈറൽ നൃത്തമായ ‘ഗ്രിഡി’ കളിക്കുന്ന ദൃശ്യങ്ങൾ പുറത്തുവന്നതോടെ വ്യാപക പ്രതിഷേധം. തിങ്കളാഴ്ചയാണ് ഏകദേശം 13 മീറ്റർ നീളമുള്ള ഭീമൻ തിമിംഗലത്തിന്റെ ജഡം തീരത്തടിഞ്ഞത്.
സംഭവത്തെ ശക്തമായി അപലപിച്ച കേംബ്രിഡ്ജ് മേയർ ഗാരി മാക്ക്, വന്യജീവികളുടെ ജഡങ്ങൾ ആളുകൾക്ക് കളിക്കാനുള്ള വസ്തുക്കളല്ലെന്ന് ഓർമ്മിപ്പിച്ചു. ചത്ത തിമിംഗലത്തിന്റെ സാന്നിധ്യം കാരണം തീരത്തേക്ക് വൻതോതിൽ വലിപ്പമേറിയ സ്രാവുകൾ കൂട്ടത്തോടെ എത്താൻ തുടങ്ങിയതോടെ അധികൃതർ ബീച്ച് പൂർണ്ണമായും അടച്ചുപൂട്ടി. മേഖലയിൽ വലിയ സ്രാവുകളെ ടാഗ് ചെയ്യാനുള്ള പ്രത്യേക ദൗത്യവും അധികൃതർ ആരംഭിച്ചിട്ടുണ്ട്.
വൻകിട യന്ത്രസാമഗ്രികൾ ഉപയോഗിച്ച് തിമിംഗലത്തിന്റെ ജഡം തീരത്തുനിന്ന് നീക്കം ചെയ്ത് ലാൻഡ്ഫില്ലിലേക്ക് മാറ്റാനുള്ള നടപടികൾ ഭരണകൂടം സ്വീകരിച്ചുവരികയാണ്. അഴുകിത്തുടങ്ങിയ ജഡം പൊതുജനാരോഗ്യത്തിനും പരിസരത്തെ വന്യജീവികൾക്കും ഒരുപോലെ അപകടസാധ്യത ഉയർത്തുന്നതിനാൽ ആരും ഇതിനടുത്തേക്ക് പോകരുതെന്ന് അധികൃതർ കർശന മുന്നറിയിപ്പ് നൽകി. സ്വയം അപകടം ക്ഷണിച്ചുവരുത്തുന്നതിനൊപ്പം രക്ഷാപ്രവർത്തകരെയും പ്രതിസന്ധിയിലാക്കുന്ന ഇത്തരം നിരുത്തരവാദപരമായ പ്രവൃത്തികൾ ചെയ്യുന്നവർക്കെതിരെ കനത്ത പിഴയടക്കമുള്ള ശിക്ഷാനടപടികൾ ഏർപ്പെടുത്തണമെന്ന ആവശ്യവും ഇതോടെ ശക്തമാകുന്നുണ്ട്.
