വാഷിങ്ടൺ: നവംബർ മൂന്നിന് നടക്കുന്ന യുഎസ് ഇടക്കാല തിരഞ്ഞെടുപ്പിന് മുമ്പ് ഇറാനെ ആക്രമിക്കില്ലെന്ന് പ്രഖ്യാപിച്ച് പ്രസിഡന്റ് ഡോണൾഡ് ട്രംപ്. ഇറാനുമായി ക്രിയാത്മകമായ ചർച്ചകൾ തുടരുകയാണെന്നും സാമ്പത്തികമായും സൈനികമായും ഇറാൻ ദുർബലാവസ്ഥയിലാണെന്നും ട്രംപ് സമൂഹമാധ്യമമായ ട്രൂത്ത് സോഷ്യലിൽ കുറിച്ചു.
ഇറാനുമായുള്ള ചർച്ചകൾ പുരോഗമിക്കുന്ന സാഹചര്യത്തിൽ തിരഞ്ഞെടുപ്പിന് മുമ്പ് സൈനികാക്രമണം പുനരാരംഭിക്കില്ലെന്നാണ് ട്രംപിന്റെ പ്രഖ്യാപനം. അതേസമയം, ഇറാന്റെ തുറമുഖങ്ങൾക്കെതിരായ ഉപരോധം തുടരുമെന്നും ഹോർമുസ് കടലിടുക്കിലൂടെ എണ്ണ നീക്കം റെക്കോർഡ് നിലയിലാണെന്നും അദ്ദേഹം അവകാശപ്പെട്ടു. ഒരു രാത്രിയിൽ മാത്രം 2.2 കോടി ബാരൽ എണ്ണ കടന്നുപോയെന്നും ഇതിൽ ഇറാനിൽനിന്നുള്ള എണ്ണ ഉൾപ്പെട്ടിട്ടില്ലെന്നും ട്രംപ് അവകാശപ്പെട്ടെങ്കിലും ഈ കണക്ക് സ്വതന്ത്രമായി സ്ഥിരീകരിക്കപ്പെട്ടിട്ടില്ല.
ഇറാനുമായുള്ള സംഘർഷം അവസാനിപ്പിക്കുന്നതിനായി ഇരുരാജ്യങ്ങളും തമ്മിൽ നയതന്ത്ര ചർച്ചകൾ നടക്കുന്നുണ്ട്. എന്നാൽ, ആണവപദ്ധതി, ഹോർമുസ് കടലിടുക്കിന്റെ നിയന്ത്രണം, ഉപരോധം തുടങ്ങിയ വിഷയങ്ങളിൽ ഇരുരാജ്യങ്ങൾക്കുമിടയിൽ അഭിപ്രായവ്യത്യാസങ്ങൾ തുടരുകയാണ്. നേരത്തേ വെടിനിർത്തലിനും സമാധാന കരാറിനുമായി നടത്തിയ ശ്രമങ്ങൾ പരാജയപ്പെട്ടിരുന്നു.
തിരഞ്ഞെടുപ്പിന് മുമ്പ് ഇറാനെതിരായ സൈനിക നടപടി പുനരാരംഭിക്കാനുള്ള സാധ്യത യുഎസ് ഭരണകൂടം പരിഗണിക്കുന്നതായി നേരത്തേ റിപ്പോർട്ടുകളുണ്ടായിരുന്നു. എന്നാൽ, പുതിയ പ്രസ്താവനയിലൂടെ നവംബർ മൂന്നിന് മുമ്പ് ആക്രമണം നടത്തില്ലെന്ന് ട്രംപ് വ്യക്തമാക്കി. തിരഞ്ഞെടുപ്പിനുശേഷം അമേരിക്കയുടെ നിലപാട് എന്തായിരിക്കുമെന്ന കാര്യത്തിൽ അദ്ദേഹം വ്യക്തത വരുത്തിയിട്ടില്ല.
ഇറാനുമായുള്ള ചർച്ചകൾ തുടരുമ്പോഴും മേഖലയിൽ സംഘർഷാവസ്ഥ നിലനിൽക്കുകയാണ്. ഹോർമുസ് കടലിടുക്കിലെ പ്രതിസന്ധി ആഗോള എണ്ണവിപണിയെയും ഊർജവിതരണത്തെയും ബാധിക്കുന്ന സാഹചര്യത്തിൽ, ട്രംപിന്റെ പ്രഖ്യാപനം അന്താരാഷ്ട്ര തലത്തിൽ ശ്രദ്ധ നേടിയിട്ടുണ്ട്.
