കൊച്ചി: വർധിച്ചുവരുന്ന സൈബർ സുരക്ഷാ വെല്ലുവിളികൾ നേരിടുന്നതിനായി കേരള പോലീസിന്റെ സൈബർഡോം കൂടുതൽ ശക്തിപ്പെടുത്തുമെന്നും, ട്രാഫിക് നിയന്ത്രണത്തിനും ദുരന്തനിവാരണത്തിനുമായി തദ്ദേശീയമായി വികസിപ്പിച്ച അത്യാധുനിക റോബോട്ടുകളെ രംഗത്തിറക്കുമെന്നും ആഭ്യന്തരമന്ത്രി രമേശ് ചെന്നിത്തല അറിയിച്ചു. 19-ാമത് ‘കൊക്കൂൺ’ അന്താരാഷ്ട്ര സൈബർ സെക്യൂരിറ്റി ആൻഡ് ഹാക്കിംഗ് കോൺഫറൻസ് കൊച്ചിയിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സാങ്കേതികവിദ്യയുടെ വളർച്ചയ്ക്കൊപ്പം സൈബർ ആക്രമണങ്ങളും സങ്കീർണ്ണമായ സുരക്ഷാ ഭീഷണികളും വർധിക്കുകയാണെന്ന് അദ്ദേഹം ചൂണ്ടിക്കാട്ടി. വ്യക്തിഗത വിവരങ്ങളുടെ മോഷണം, സാമ്പത്തിക തട്ടിപ്പുകൾ എന്നിവ വ്യക്തികളെയും സ്ഥാപനങ്ങളെയും സാരമായി ബാധിക്കുന്നുണ്ട്. വൈദ്യുതി നിലയങ്ങൾ, ആശുപത്രികൾ, ധനകാര്യ സ്ഥാപനങ്ങൾ തുടങ്ങിയ നിർണായക അടിസ്ഥാന സൗകര്യങ്ങളുടെയും സൈനിക-സർക്കാർ രേഖകളുടെയും സുരക്ഷ ഉറപ്പാക്കേണ്ടത് അത്യന്താപേക്ഷിതമാണ്. എഐ (നിർമിതബുദ്ധി) യുദ്ധം, രാഷ്ട്രീയം, ഭരണനിർവഹണം തുടങ്ങിയ മേഖലകളിൽ വ്യാപകമാകുന്നതോടെ ഉണ്ടാകുന്ന പുതിയ വെല്ലുവിളികളെ നേരിടാൻ ഡാറ്റാ സംരക്ഷണത്തിനും വ്യക്തിവിവര സ്വകാര്യതയ്ക്കും മുൻഗണന നൽകണം. നിരീക്ഷണ സംവിധാനങ്ങൾ നിയമാനുസൃതവും സുതാര്യവുമായിരിക്കണമെന്നും അദ്ദേഹം വ്യക്തമാക്കി.
ട്രാഫിക് നിയന്ത്രണം, രക്ഷാപ്രവർത്തനം, ഇൻഡസ്ട്രിയൽ ഓട്ടോമേഷൻ തുടങ്ങിയ മേഖലകൾക്കായി ഐഹബ് റോബോട്ടിക്സിന്റെ (iHUB Robotics) സഹായത്തോടെ വികസിപ്പിച്ച മൂന്ന് പ്രധാന റോബോട്ടിക് സംവിധാനങ്ങൾ മന്ത്രി അവതരിപ്പിച്ചു:
ദക്ഷ: റോഡുകളിലെ ട്രാഫിക് നിയന്ത്രണത്തിനായി പ്രത്യേകമായി രൂപകൽപ്പന ചെയ്തത്. കടുത്ത വെയിലും മഴയും വകവെക്കാതെ ജോലി ചെയ്യുന്ന ട്രാഫിക് പോലീസുകാരുടെ ജോലിഭാരം കുറയ്ക്കാൻ ഇത് സഹായിക്കും.
കവച്: ദുഷ്കരമായ ഭൂപ്രദേശങ്ങളിൽ രക്ഷാപ്രവർത്തനങ്ങൾ നടത്താനും ദുരന്തമുഖങ്ങളിൽ അവശ്യസാധനങ്ങൾ എത്തിക്കാനും സജ്ജമാക്കിയത്.
താര: വിവിധ ഭാഷകളിൽ വിവരങ്ങൾ നൽകാനും ഓഫീസുകളിലും പരിപാടികളിലും സന്ദർശകർക്ക് വഴികാട്ടാനും ശേഷിയുള്ള സെമി-ഹ്യൂമനോയിഡ് റോബോട്ട്.
സൈബർ സുരക്ഷാ രംഗത്തെ രാജ്യാന്തര ഭീഷണികളെ പ്രതിരോധിക്കാൻ സർക്കാരും പോലീസും സാങ്കേതികവിദ്യാ വിദഗ്ധരും സ്വകാര്യ മേഖലയും ഒത്തുചേർന്നുള്ള പൊതുജന-സ്വകാര്യ പങ്കാളിത്തം (PPP) അനിവാര്യമാണെന്ന് മന്ത്രി കൂട്ടിച്ചേർത്തു. സൈബർ മേഖലയിൽ വൈദഗ്ധ്യമുള്ള ഉദ്യോഗസ്ഥരെ സജ്ജരാക്കുന്നതിനൊപ്പം പൊതുജനങ്ങളിൽ ഡിജിറ്റൽ സാക്ഷരതയും അവബോധവും വളർത്താൻ സർക്കാർ സമഗ്ര പദ്ധതികൾ ആവിഷ്കരിക്കുമെന്നും അദ്ദേഹം പറഞ്ഞു.
