ന്യൂഡൽഹി: ഏഷ്യൻ ഗെയിംസിൽ ചരിത്രനേട്ടം സ്വന്തമാക്കിയ ഇന്ത്യൻ വനിതാ ഹോക്കി ടീമിലെ ഓരോ താരത്തിനും 11 ലക്ഷം രൂപ വീതം പാരിതോഷികം പ്രഖ്യാപിച്ച് ഹോക്കി ഇന്ത്യ. ടീമിലെ സപ്പോർട്ട് സ്റ്റാഫിലെ ഓരോ അംഗത്തിനും 5.5 ലക്ഷം രൂപ വീതവും നൽകും. ചൈനയെ തോൽപ്പിച്ച് 44 വർഷത്തിനുശേഷം ഏഷ്യൻ ഗെയിംസ് വനിതാ ഹോക്കിയിൽ ഇന്ത്യ സ്വർണം നേടിയതിനു പിന്നാലെയാണ് പ്രഖ്യാപനം.
ജപ്പാനിലെ കകാമിഗഹാരയിൽ വെള്ളിയാഴ്ച നടന്ന ഫൈനലിൽ നിലവിലെ ചാമ്പ്യന്മാരായ ചൈനയെ ഇന്ത്യ 1–0ന് പരാജയപ്പെടുത്തി. മത്സരത്തിന്റെ പത്താം മിനിറ്റിൽ ലാൽറെംസിയാമി നേടിയ ഗോളാണ് ഇന്ത്യക്ക് വിജയം സമ്മാനിച്ചത്. ചൈനയ്ക്ക് ലഭിച്ച പെനാൽറ്റി സ്ട്രോക്ക് ഇന്ത്യൻ ഗോൾകീപ്പർ സവിത രക്ഷപ്പെടുത്തുകയും ചെയ്തു.
1982ൽ ഡൽഹിയിൽ നടന്ന ഏഷ്യൻ ഗെയിംസിലാണ് ഇന്ത്യൻ വനിതാ ടീം ഇതിനു മുമ്പ് സ്വർണം നേടിയത്. 44 വർഷത്തെ ഇടവേളയ്ക്കുശേഷമുള്ള ഈ നേട്ടത്തോടെ ഏഷ്യൻ ഗെയിംസ് വനിതാ ഹോക്കിയിൽ ഇന്ത്യ രണ്ടാം തവണയാണ് സ്വർണമണിയുന്നത്.
