കാൻബറ: വർദ്ധിച്ചുവരുന്ന ജീവിതച്ചെലവുകൾക്കിടയിൽ ആശ്വാസമായി പെൻഷൻ, ജോബ് സീക്കർ, റെന്റ് അസിസ്റ്റൻസ് ഉൾപ്പെടെയുള്ള സെന്റർലിങ്ക് ആനുകൂല്യങ്ങളിൽ ഓസ്ട്രേലിയൻ സർക്കാർ വൻ വർദ്ധനവ് പ്രഖ്യാപിച്ചു. 5.3 ദശലക്ഷത്തോളം ആളുകൾക്ക് പ്രയോജനപ്പെടുന്ന ഈ നിരക്കുകൾ സെപ്റ്റംബർ 20 മുതൽ പ്രാബല്യത്തിൽ വരും. പുതിയ മാറ്റങ്ങൾ ഓസ്ട്രേലിയൻ മലയാളി സമൂഹത്തിലെ മുതിർന്ന പൗരന്മാർക്കും വാടകക്കാർക്കും വലിയ സാമ്പത്തിക സഹായമാകും.
സെപ്റ്റംബർ 20 മുതൽ എജ് പെൻഷൻ ഉൾപ്പെടെയുള്ള പ്രധാന ആനുകൂല്യങ്ങളിൽ കാര്യമായ വർദ്ധനവാണ് ഉണ്ടാവുക. സിംഗിൾ പെൻഷൻകാർക്ക് രണ്ടാഴ്ച കൂടുമ്പോൾ $36.80 വർദ്ധിച്ച് പരമാവധി $1,237.70 ലഭിക്കും. ദമ്പതികൾക്ക് സംയുക്തമായി $55.60 വർദ്ധിച്ച് ആകെ $1,866.00 ആയി മാറും. ജോബ് സീക്കർ പേയ്മെന്റുകളിൽ കുട്ടികളില്ലാത്ത സിംഗിൾ വ്യക്തികൾക്ക് രണ്ടാഴ്ച കൂടുമ്പോൾ $16.20 വർദ്ധിച്ച് ആകെ തുക $833.70 ആയി ഉയരും. പാരന്റിംഗ് പേയ്മെന്റ് നേടുന്ന സിംഗിൾ വ്യക്തികൾക്ക് $20.90 വർദ്ധിച്ച് $1,087.20 ലഭിക്കുമെന്ന് സാമൂഹ്യ സേവന മന്ത്രി താന്യ പ്ലിബർസെക്ക് വ്യക്തമാക്കി.
ഏകദേശം ഒരു ദശലക്ഷത്തോളം വാടകക്കാർക്ക് ഗുണകരമാകുന്ന കോമൺവെൽത്ത് റെന്റ് അസിസ്റ്റൻസ് പേയ്മെന്റുകളിലും മാറ്റം വരും. 2022 മുതൽ ഈ നിരക്കുകളിൽ 53 ശതമാനത്തോളം വർദ്ധനവുണ്ടായിട്ടുണ്ടെന്ന് സർക്കാർ ചൂണ്ടിക്കാട്ടുന്നു. ഇതോടൊപ്പം ഡീമിംഗ് റേറ്റുകളിലും സുപ്രധാന പരിഷ്കാരങ്ങൾ വരുത്തിയിട്ടുണ്ട്. സിംഗിൾ വ്യക്തികൾക്ക് $66,800 വരേക്കും ദമ്പതികൾക്ക് $110,600 വരേക്കുമുള്ള സാമ്പത്തിക നിക്ഷേപങ്ങൾക്ക് പുതിയ ഡീമിംഗ് നിരക്ക് 1.75 ശതമാനമായിരിക്കും. ഇതിന് മുകളിലുള്ള തുകയ്ക്ക് 3.75 ശതമാനം നിരക്ക് ബാധകമാകും എന്ന് ഓസ്ട്രേലിയൻ ഗവൺമെന്റ് ആക്ച്വറി നിർദ്ദേശിച്ചു.
ഓസ്ട്രേലിയയിൽ സ്ഥിരതാമസമാക്കിയ മലയാളി സമൂഹത്തിലെ നിരവധി ആളുകൾക്ക് ഈ സൂചിക വർദ്ധനവിന്റെ പ്രയോജനം ലഭിക്കും. എന്നിരുന്നാലും, ഓരോ വ്യക്തിയുടെയും ആസ്തി, അധിക വരുമാനം, കുടുംബ പശ്ചാത്തലം എന്നിവയെ അടിസ്ഥാനമാക്കിയാണ് കൃത്യമായ തുക നിശ്ചയിക്കുക. കൂടുതൽ വിവരങ്ങൾക്കും പുതുക്കിയ നിരക്കുകൾ അറിയുന്നതിനും Department of Social Services ഔദ്യോഗിക പോർട്ടൽ സന്ദർശിക്കാവുന്നതാണ്
