സിഡ്നി: ന്യൂ സൗത്ത് വെയിൽസ് ലിബറൽ പാർട്ടിയിലെ അഴിമതി ആരോപണങ്ങളുമായി ബന്ധപ്പെട്ട് നടക്കുന്ന അന്വേഷണത്തിൽ, നിർണായക തെളിവുകൾ നശിപ്പിക്കാനല്ല ഔദ്യോഗിക ഫോണും ഐപാഡും ഫാക്ടറി റീസെറ്റ് ചെയ്തതെന്ന് കാത്തലിക് സ്കൂൾസ് എൻ.എസ്.ഡബ്ല്യു (Catholic Schools NSW) ചീഫ് എക്സിക്യൂട്ടീവ് ഡാളസ് മക്കിനർണി. എൻ.എസ്.ഡബ്ല്യു ഇൻഡിപെൻഡന്റ് കമ്മീഷൻ എഗെയിൻസ്റ്റ് കറപ്ഷന് (ICAC) മുൻപാകെ മൊഴി നൽകുന്നതിനിടെയാണ് അദ്ദേഹം ഈ കാര്യം വ്യക്തമാക്കിയത്.
തന്റെ ബാങ്ക് അക്കൗണ്ടിൽ സാമ്പത്തിക ക്രമക്കേട് നടന്നതായി നാഷണൽ ഓസ്ട്രേലിയ ബാങ്ക് (NAB) മുന്നറിയിപ്പ് നൽകിയതിനെ തുടർന്നാണ് വിവരങ്ങൾ ചോരാതിരിക്കാൻ ഫോൺ റീസെറ്റ് ചെയ്തതെന്നും, സ്ഥാപനത്തിലേക്ക് തിരികെ പോകാൻ സാധ്യതയില്ലാത്തതിനാലാണ് ഐപാഡ് റീസെറ്റ് ചെയ്തതെന്നും അദ്ദേഹം മൊഴി നൽകി. എന്നാൽ, കമ്മീഷന് നിർണായകമായേക്കാവുന്ന ഫോൺ സന്ദേശങ്ങളും തെളിവുകളും മനഃപൂർവ്വം നശിപ്പിക്കാനുള്ള നീക്കമായിരുന്നു ഇതെന്ന് കമ്മീഷനെ സഹായിക്കുന്ന അഭിഭാഷക ഡോ. പെഗ്ഗി ഡ്വയർ ചൂണ്ടിക്കാട്ടി. 2019 ഏപ്രിൽ മുതൽ 2023 ജൂലൈ വരെയുള്ള കാലയളവിൽ ‘റിഫോർമേഴ്സ്’ അംഗങ്ങളുമായി നടത്തിയ എല്ലാ സന്ദേശങ്ങളും ഹാജരാക്കാൻ കമ്മീഷൻ ഉത്തരവിട്ടിട്ടുണ്ട്.
ലിബറൽ പാർട്ടിയിലേക്ക് പുതിയ അംഗങ്ങളെ ചേർക്കുന്നതിനായി ക്രിസ്ത്യൻ ലിബറൽ വിഭാഗമായ റിഫോർമേഴ്സ് അനധികൃത സംഭാവനകൾ സ്വീകരിച്ചുവെന്ന ആരോപണത്തിലാണ് ഐസിഎസി അന്വേഷണം പുരോഗമിക്കുന്നത്. മുൻ ഫെഡറൽ ഊർജ്ജ മന്ത്രി ആംഗസ് ടെയ്ലറുമായി കൂടിക്കാഴ്ചയ്ക്ക് അവസരമൊരുക്കാൻ മക്കിനർണി നിരന്തരം ശ്രമിച്ചിരുന്നതായും അന്വേഷണത്തിൽ വെളിപ്പെട്ടു. അതേസമയം, അന്വേഷണ പരിധിയിൽ പേര് ഉൾപ്പെട്ടിട്ടില്ലാത്ത ആംഗസ് ടെയ്ലർ ഈ ആരോപണങ്ങൾ നേരത്തെ തന്നെ തള്ളിക്കളഞ്ഞിരുന്നു.
റിഫോർമേഴ്സ് അംഗങ്ങളായ ക്രിസ്റ്റ്യൻ എല്ലിസ്, ജെറമി ഗ്രീൻവുഡ് എന്നിവരുടെ കമ്പനികൾക്ക് കൺസൾട്ടിംഗ് ഫീസായി കാത്തലിക് സ്കൂൾസ് എൻ.എസ്.ഡബ്ല്യു $265,900 നൽകിയതായി കമ്മീഷൻ കണ്ടെത്തിയിട്ടുണ്ട്. ഇത് പാർട്ടി പ്രവർത്തനങ്ങൾക്കായല്ല, മറിച്ച് സ്ഥാപനത്തിന് നൽകിയ സേവനങ്ങൾക്കുള്ളതായിരുന്നുവെന്ന് മക്കിനർണി വാദിച്ചു. ലിബറൽ എം.പി മെലിസ മക്കിന്റോഷിനെ അപകീർത്തിപ്പെടുത്തുന്ന തരത്തിലുള്ള സന്ദേശങ്ങൾ കൈമാറിയതും ‘ഫോർ കോർണേഴ്സ്’ അന്വേഷണ പരിപാടിയെ പ്രതിരോധിക്കാൻ വാട്സാപ്പ് കൂട്ടായ്മ ഉണ്ടാക്കിയതുമടക്കമുള്ള കാര്യങ്ങളും വിചാരണയിൽ പരാമർശിക്കപ്പെട്ടു. അന്വേഷണം ആരംഭിക്കുന്നതിന് മുൻപ് തന്നെ മക്കിനർണി സി.ഇ.ഒ സ്ഥാനത്ത് നിന്ന് മാറിനിന്നിരുന്നു. സംഭവത്തിൽ ഐസിഎസി കമ്മീഷന്റെ വിശദമായ അന്വേഷണം തുടരുകയാണ്.
