ദുബായ്: ദുബായിൽനിന്ന് ടെൽ അവീവിലേക്ക് പോയ ഫ്ലൈദുബായ് FZ1073 വിമാനത്തിൽ കോക്പിറ്റിലുണ്ടായ ഗുരുതര സംഭവത്തിൽ ഇന്ത്യൻ ക്യാപ്റ്റൻ സ്മിത് മച്ച്ഛാറിനും ഇടപെട്ട യാത്രക്കാർക്കും വിവിധ നേതാക്കളുടെ പ്രശംസ. സംഭവത്തെ തുടർന്ന് ഫ്ലൈദുബായ് ഇസ്രയേലിലേക്കും തിരിച്ചുമുള്ള സർവീസുകൾ താൽക്കാലികമായി നിർത്തിവച്ചു. അന്വേഷണം പൂർത്തിയാക്കി സംഭവത്തിന്റെ മുഴുവൻ വസ്തുതകളും കണ്ടെത്തുന്നതുവരെ സർവീസ് നിർത്തിവയ്ക്കുമെന്ന് വിമാനക്കമ്പനി അറിയിച്ചു.
ബുധനാഴ്ച ദുബായിൽനിന്ന് ടെൽ അവീവിലേക്ക് പറന്ന വിമാനത്തിൽ കോക്പിറ്റിൽ പൈലറ്റുമാർ തമ്മിൽ സംഘർഷമുണ്ടാവുകയായിരുന്നു. സംഭവത്തിനിടെ ക്യാപ്റ്റൻ സ്മിത് മച്ച്ഛാറിന് കുത്തേറ്റതായി ഇസ്രയേൽ അധികൃതർ അറിയിച്ചു. തുടർന്ന് വിമാനം അതിവേഗം ഉയരം താഴ്ത്തുകയും സൗദി അറേബ്യയിലെ തബൂക്ക് വിമാനത്താവളത്തിലേക്ക് തിരിച്ചുവിടുകയും ചെയ്തു. വിമാനത്തിലുണ്ടായിരുന്ന യാത്രക്കാരും ജീവനക്കാരും സുരക്ഷിതരായി ഇറങ്ങി.
പരിക്കേറ്റ ക്യാപ്റ്റൻ കോക്പിറ്റ് വാതിൽ തുറക്കാൻ കഴിഞ്ഞതിനെ തുടർന്ന് യാത്രക്കാരും വിമാനത്തിലെ ജീവനക്കാരും അകത്ത് പ്രവേശിച്ച് ആക്രമണത്തിൽപ്പെട്ടയാളെ കീഴടക്കിയെന്നാണ് ഇസ്രയേൽ അധികൃതരുടെ വിശദീകരണം. വിമാനത്തിലുണ്ടായിരുന്ന അധിക ഫ്ലൈദുബായ് പൈലറ്റുമാർ പിന്നീട് നിയന്ത്രണം ഏറ്റെടുത്താണ് വിമാനം തബൂക്കിൽ സുരക്ഷിതമായി ഇറക്കിയത്.
സംഭവത്തിൽ ക്യാപ്റ്റൻ മച്ച്ഛാറിനും സഹപൈലറ്റിനും പരിക്കേറ്റു. ഇരുവരെയും തബൂക്കിലെ ആശുപത്രിയിൽ പ്രവേശിപ്പിച്ചു. സൗദിയിലെ ഇന്ത്യൻ എംബസിയുടെ അറിയിപ്പ് പ്രകാരം മച്ച്ഛാർ ചികിത്സയിലാണ്; അദ്ദേഹത്തിന്റെ നില സ്ഥിരമാണെന്നാണ് ലഭിച്ച വിവരം.
ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു മച്ച്ഛാറിന്റെ ധൈര്യത്തെ പ്രശംസിച്ചു. പരിക്കേറ്റിട്ടും കോക്പിറ്റ് വാതിൽ തുറക്കാൻ കഴിഞ്ഞത് കൂടുതൽ ആളുകൾക്ക് അകത്ത് പ്രവേശിച്ച് സാഹചര്യം നിയന്ത്രിക്കാൻ സഹായിച്ചതായി അദ്ദേഹം പറഞ്ഞു. വിമാനത്തിലുണ്ടായിരുന്ന 174 പേരുടെ ജീവൻ രക്ഷിക്കുന്നതിൽ ക്യാപ്റ്റന്റെ നടപടിക്ക് പങ്കുണ്ടായെന്നും നെതന്യാഹു വ്യക്തമാക്കി.
അതേസമയം, സംഭവത്തിന്റെ കൃത്യമായ കാരണം സംബന്ധിച്ച് അന്വേഷണം തുടരുകയാണ്. വിമാനത്തിലെ സുരക്ഷാ സംഭവത്തിന്റെ കാരണങ്ങളും സാഹചര്യങ്ങളും പരിശോധിക്കാൻ ബന്ധപ്പെട്ട അധികൃതർ അന്വേഷണം നടത്തുന്നുണ്ടെന്നും ഔദ്യോഗിക അന്വേഷണ റിപ്പോർട്ട് പുറത്തുവരുന്നതിന് മുമ്പ് സ്ഥിരീകരിക്കാത്ത വിവരങ്ങൾ പ്രചരിപ്പിക്കരുതെന്നും യുഎഇ ജനറൽ സിവിൽ ഏവിയേഷൻ അതോറിറ്റി അറിയിച്ചു.
സംഭവത്തിന് പിന്നിലെ ഉദ്ദേശ്യം സംബന്ധിച്ചും ഔദ്യോഗിക സ്ഥിരീകരണം വന്നിട്ടില്ല. അതിനാൽ അന്വേഷണം പൂർത്തിയാകുന്നതിന് മുമ്പ് സംഭവത്തിന്റെ ഉദ്ദേശ്യമോ സ്വഭാവമോ സംബന്ധിച്ച് അന്തിമ നിഗമനത്തിലെത്താനാകില്ല.
