യൂക്ല: പടിഞ്ഞാറൻ ഓസ്‌ട്രേലിയയിലെ (WA) ഐർ ഹൈവേയിൽ (Eyre Highway) അടിയന്തര വൈദ്യസഹായത്തിനായി ഇറങ്ങിയ റോയൽ ഫ്ലൈയിംഗ് ഡോക്ടർ വിമാനം തിരിച്ചുപറക്കാൻ സഹായിച്ച് മൂന്ന് സാധാരണക്കാർ മാതൃകയായി. യൂക്ലയ്ക്ക് സമീപം അതീവ ഗുരുതരാവസ്ഥയിലുള്ള ഒരു രോഗിയെ അടിയന്തരമായി മാറ്റുന്നതിനായാണ് ഫ്ലൈയിംഗ് ഡോക്ടർ വിമാനം റോഡിലിറക്കിയത്. എന്നാൽ, റോഡിന്റെ വീതിക്കുറവ് കാരണം വിമാനം പറന്നുയരാൻ പാകത്തിൽ സ്ഥാനത്തേക്ക് മാറ്റുന്നത് പ്രതിസന്ധി സൃഷ്ടിക്കുകയായിരുന്നു.
ഓരോ മിനിറ്റും നിർണ്ണായകമായ ഈ ഘട്ടത്തിൽ, വഴിയിലുണ്ടായിരുന്ന മൂന്ന് യാത്രക്കാർ സ്വയം മുന്നോട്ടുവന്ന് വിമാനം തള്ളി അനുയോജ്യമായ സ്ഥാനത്തേക്ക് മാറ്റാൻ സഹായിക്കുകയായിരുന്നു. ഈ ദൗത്യം പൂർത്തിയാക്കുന്നതിനായി ഐർ ഹൈവേയിൽ ഗതാഗതം താൽക്കാലികമായി നിർത്തിവെച്ചിരുന്നു. സമയബന്ധിതമായി മുന്നോട്ടുവന്ന് സഹായിച്ച മൂന്ന് വ്യക്തികൾക്കും, റോഡ് അടച്ചിട്ടപ്പോൾ ക്ഷമയോടെ സഹകരിച്ച മറ്റ് വാഹനയാത്രക്കാർക്കും യൂക്ല പോലീസ് പ്രത്യേക നന്ദി രേഖപ്പെടുത്തി.
