ന്യൂഡൽഹി: ഒരു ദശാബ്ദത്തിന് ശേഷം ഇൻസ്റ്റഗ്രാം തങ്ങളുടെ വേഡ്മാർക്ക് പുതുക്കി. 2016 മുതൽ ഉപയോഗിച്ചിരുന്ന കൈയെഴുത്ത് ശൈലിയിലുള്ള അക്ഷരരൂപത്തിന് പകരമാണ് പുതിയ ഡിസൈൻ അവതരിപ്പിച്ചത്. ഇൻസ്റ്റഗ്രാം മേധാവി ആദം മൊസേരി വ്യാഴാഴ്ചയാണ് മാറ്റം പ്രഖ്യാപിച്ചത്. പുതിയ രൂപം കൂടുതൽ വൃത്തിയുള്ളതും ആധുനികവുമാണെന്നാണ് കമ്പനിയുടെ വിശദീകരണം.
എന്നാൽ മാറ്റം പ്രഖ്യാപിച്ചതിന് പിന്നാലെ സമൂഹമാധ്യമങ്ങളിൽ വിമർശനങ്ങളും പരിഹാസങ്ങളും ഉയർന്നു. പുതിയ അക്ഷരരൂപത്തിലെ പ്രത്യേകിച്ച് ‘r’ വ്യക്തമായി വായിക്കാൻ ബുദ്ധിമുട്ടാണെന്നും ‘Instagram’ എന്നതിന് പകരം ‘Instagzam’ എന്നതുപോലെ തോന്നുന്നുവെന്നുമാണ് ചില ഉപയോക്താക്കളുടെ പ്രതികരണം. അതേസമയം പുതിയ ഡിസൈൻ ഇഷ്ടപ്പെട്ടവരുമുണ്ട്.
ഇത് ഇൻസ്റ്റഗ്രാമിന്റെ ആപ്പ് ഐക്കണിൽ വരുത്തിയ മാറ്റമല്ലെന്നതാണ് പ്രധാന കാര്യം. ഉപയോക്താക്കൾ ഫോണിൽ ടാപ്പ് ചെയ്യുന്ന ബഹുവർണ ക്യാമറ ഐക്കൺ നിലവിൽ മാറ്റമില്ലാതെ തുടരുകയാണ്. മാറ്റം പ്രധാനമായും ‘Instagram’ എന്ന പേരിന്റെ ടൈപ്പോഗ്രാഫിയിലാണ്.
പുതിയ വേഡ്മാർക്ക് പഴയ കൈയെഴുത്ത് ശൈലിയുടെ ചില സവിശേഷതകൾ നിലനിർത്തിക്കൊണ്ടാണ് രൂപകൽപ്പന ചെയ്തിരിക്കുന്നത്. കൂടുതൽ ആധുനികവും ഇൻസ്റ്റഗ്രാമിന്റെ നിലവിലെ ദൃശ്യഭാഷയുമായി പൊരുത്തപ്പെടുന്നതുമായ രൂപമാണ് ലക്ഷ്യമിട്ടതെന്ന് കമ്പനി വ്യക്തമാക്കി.
2016ലാണ് ഇൻസ്റ്റഗ്രാം അവസാനമായി പ്രധാനപ്പെട്ട ബ്രാൻഡ് രൂപമാറ്റം വരുത്തിയത്. അന്ന് ആപ്പിന്റെ ക്യാമറ ഐക്കണും ദൃശ്യഭാഷയും വലിയ രീതിയിൽ പുതുക്കിയിരുന്നു. പുതിയ മാറ്റത്തോടെ അടുത്ത ഘട്ടത്തിൽ ആപ്പ് ഐക്കണിലും മാറ്റമുണ്ടാകുമോ എന്ന കാര്യത്തിൽ മെറ്റ ഇതുവരെ സൂചന നൽകിയിട്ടില്ല.
