ലഖ്‌നൗ: ഉത്തർപ്രദേശിലെ ഗൗതം ബുദ്ധ നഗറിലുള്ള നിർദ്ദിഷ്ട നോയ്ഡ അന്താരാഷ്ട്ര വിമാനത്താവളം (ജേവർ വിമാനത്താവളം) പ്രധാനമന്ത്രി നരേന്ദ്ര മോദിയുടെ പേരിൽ അറിയപ്പെടും. മുഖ്യമന്ത്രി യോഗി ആദിത്യനാഥിന്റെ അധ്യക്ഷതയിൽ ചേർന്ന മന്ത്രിസഭാ യോഗമാണ് വിമാനത്താവളത്തിന് ‘നരേന്ദ്ര മോദി ഇന്റർനാഷണൽ എയർപോർട്ട്, നോയ്ഡ-ജേവർ’ എന്ന് നാമകരണം ചെയ്യാനുള്ള നിർദ്ദേശത്തിന് അംഗീകാരം നൽകിയത്. രാജ്യത്തിന്റെ അടിസ്ഥാന സൗകര്യ വികസന രംഗത്ത് പ്രധാനമന്ത്രി നൽകിയ അതുല്യമായ സംഭാവനകളെ മുൻനിർത്തിയാണ് ഈ തീരുമാനമെന്ന് മുഖ്യമന്ത്രി വ്യക്തമാക്കി.
വടക്കേ ഇന്ത്യയിലെ ഏറ്റവും വലിയ ഏവിയേഷൻ ഹബ്ബുകളിൽ ഒന്നായാണ് ജേവർ വിമാനത്താവളം വിഭാവനം ചെയ്തിരിക്കുന്നത്. തലസ്ഥാനത്തെ ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ യാത്രാതിരക്ക് ഗണ്യമായി കുറയ്ക്കാൻ സഹായിക്കുന്ന പദ്ധതി മേഖലയിൽ വലിയ തോതിലുള്ള വ്യവസായ നിക്ഷേപത്തിനും തൊഴിലവസരങ്ങൾക്കും വഴിയൊരുക്കുമെന്നാണ് വിലയിരുത്തപ്പെടുന്നത്.
വിമാനത്താവളത്തിന്റെ പേരുമാറ്റത്തെ ബി.ജെ.പി നേതാക്കളും പ്രവർത്തകരും സ്വാഗതം ചെയ്തപ്പോൾ, നിർമ്മാണത്തിലിരിക്കുന്ന പദ്ധതികൾക്ക് ജീവിച്ചിരിക്കുന്ന ഭരണാധികാരികളുടെ പേര് നൽകുന്നതിനെതിരെ പ്രതിപക്ഷ പാർട്ടികൾ രംഗത്തെത്തിയിട്ടുണ്ട്. തീരുമാനത്തെത്തുടർന്ന് സംസ്ഥാനത്ത് അനുകൂലിച്ചും പ്രതികൂലിച്ചും ശക്തമായ രാഷ്ട്രീയ ചർച്ചകൾക്കാണ് തുടക്കമായിരിക്കുന്നത്.
