കാൻബറ: ഐസിസ് (ISIS) ബന്ധമുള്ള ഓസ്ട്രേലിയൻ പൗരന്മാരുമായി ബന്ധപ്പെട്ട നിയമത്തിലെ പഴുതുകൾ അടയ്ക്കുന്നതിൽ ലേബർ പാർട്ടിയും കൊയലിഷനും പരാജയപ്പെട്ടുവെന്ന് ആരോപിച്ച് വൺ നേഷൻ നേതാവ് പൗളിൻ ഹാൻസൻ. വിഷയത്തിൽ അടിയന്തര നടപടി ആവശ്യപ്പെട്ട് 22 പേജുള്ള സ്വന്തം സ്വകാര്യ ബിൽ അവർ പാർലമെന്റിൽ അവതരിപ്പിക്കാൻ വെല്ലുവിളിച്ചു.
ഭീകരവിരുദ്ധ നിയമങ്ങൾ കൂടുതൽ കർശനമാക്കുന്നതിന് വൺ നേഷന്റെ പിന്തുണ വാഗ്ദാനം ചെയ്ത് പ്രതിപക്ഷ നേതാവ് ആംഗസ് ടെയ്ലർക്ക് കത്തയച്ചതിന് പിന്നാലെയാണ് പൗളിൻ ഹാൻസൻ ക്രോസ്ബെഞ്ച് എംപിമാർക്കും തന്റെ ബിൽ കൈമാറിയത്. അതേസമയം, സമാന വിഷയത്തിൽ കൂടുതൽ ശക്തമായ ഭീകരവിരുദ്ധ പദ്ധതികൾ കൊണ്ടുവരാൻ കൊയലിഷനും തയ്യാറെടുപ്പുകൾ നടത്തുന്നുണ്ട്.
ഇതോടെ ഭീകരവാദത്തിനെതിരെയുള്ള പോരാട്ടം എന്നതിലുപരി, കൂടുതൽ ഫലപ്രദവും ശക്തവുമായ നിയമനിർമ്മാണം ആരുടേതാണെന്ന കാര്യത്തിൽ കൺസർവേറ്റീവ് ചേരികൾക്കിടയിലെ നേരിട്ടുള്ള രാഷ്ട്രീയ പോരാട്ടമായി ഈ വിഷയം മാറിയിരിക്കുകയാണ്. ഇതിൽ ഏത് നിർദ്ദേശത്തിനാണ് കൂടുതൽ പിന്തുണ ലഭിക്കുക എന്നതിനെ ആശ്രയിച്ചായിരിക്കും വരുംദിവസങ്ങളിലെ രാഷ്ട്രീയ നീക്കങ്ങൾ
