കീവ്: യുക്രെയ്നിൽ റഷ്യ നടത്തിയ വ്യോമാക്രമണങ്ങളിൽ ആറുപേർ കൊല്ലപ്പെട്ടതായി പ്രാദേശിക അധികൃതർ അറിയിച്ചു. കീവ്, ഒഡേസ, സുമി മേഖലകളിലാണ് ആക്രമണങ്ങളിൽ ആളപായമുണ്ടായത്.
കീവിൽ റഷ്യൻ ഡ്രോൺ ആക്രമണത്തിൽ ഒരു നോൺ-റെസിഡൻഷ്യൽ കെട്ടിടത്തിൽ ഒരാൾ കൊല്ലപ്പെട്ടു. നഗരത്തിന്റെ പ്രാന്തപ്രദേശങ്ങളിൽ നടന്ന തുടർ ഡ്രോൺ ആക്രമണങ്ങളിൽ ഒരാൾ കൂടി കൊല്ലപ്പെടുകയും അഞ്ചുപേർക്ക് പരിക്കേൽക്കുകയും ചെയ്തു. ഒഡേസ മേഖലയിലുണ്ടായ ആക്രമണത്തിൽ ഒരാൾ കൊല്ലപ്പെടുകയും രണ്ടുപേർക്ക് പരിക്കേൽക്കുകയും ചെയ്തു.
വടക്കൻ യുക്രെയ്നിലെ സുമിയിൽ റഷ്യൻ ഗൈഡഡ് ബോംബുകൾ പതിച്ച് ഒരു സ്ത്രീയും 16കാരിയും കൊല്ലപ്പെട്ടു. അഞ്ചുപേർക്ക് പരിക്കേറ്റതായും പ്രാദേശിക ഭരണകൂടം അറിയിച്ചു.
അതേസമയം, യുക്രെയ്ൻ റഷ്യയിലെ വിവിധ കേന്ദ്രങ്ങൾക്കെതിരെയും ദീർഘദൂര ഡ്രോൺ ആക്രമണങ്ങൾ നടത്തി. റഷ്യൻ അധികൃതരുടെ കണക്കനുസരിച്ച് ബെൽഗൊറോഡ് മേഖലയിൽ യുക്രെയ്ൻ ആക്രമണത്തിൽ പരിക്കേറ്റ ഒരു സ്ത്രീ ചികിത്സയ്ക്കിടെ മരിച്ചു. റഷ്യൻ അധീനതയിലുള്ള യുക്രെയ്നിലെ എനർഹോദാറിലും ഡ്രോൺ ആക്രമണത്തിൽ ഒരു സ്ത്രീ കൊല്ലപ്പെട്ടതായി റഷ്യൻ നിയമിത പ്രാദേശിക അധികൃതർ അറിയിച്ചു.
യുഎൻ പൊതുസഭാ സമ്മേളനത്തിനിടെ ജർമൻ വിദേശകാര്യ മന്ത്രി യോഹാൻ വാഡെഫുൾ റഷ്യൻ വിദേശകാര്യ മന്ത്രി സെർജി ലാവ്റോവുമായി കൂടിക്കാഴ്ച നടത്തി യുദ്ധം അവസാനിപ്പിക്കണമെന്ന് ആവശ്യപ്പെട്ടതിന് പിന്നാലെയാണ് പുതിയ ആക്രമണങ്ങൾ റിപ്പോർട്ട് ചെയ്തത്. റഷ്യൻ പക്ഷം ജർമനിയുടെ ആവശ്യം തള്ളിയതായി റിപ്പോർട്ടുകൾ പറയുന്നു.
