തൊടുപുഴ: ഇടവെട്ടി മൈലാടുംപാറയിൽ അമ്മയെ മകൻ തലയ്ക്കടിച്ചു കൊലപ്പെടുത്തിയ ദാരുണ സംഭവം നാടിനെ നടുക്കി. മൈലാടുംപാറ തരപ്പിലിന് സമീപം താമസിക്കുന്ന റേച്ചൽ ജോസഫ് (60) ആണ് സ്വന്തം മകന്റെ ആക്രമണത്തിൽ കൊല്ലപ്പെട്ടത്. സംഭവവുമായി ബന്ധപ്പെട്ട് ഇവരുടെ ഏക മകനായ ലിജോയെ പോലീസ് കസ്റ്റഡിയിലെടുത്തു.
ഹോം നഴ്സായും വീട്ടുജോലികൾ ചെയ്തുമാണ് റേച്ചൽ കുടുംബം പുലർത്തിയിരുന്നത്. മകനായ ലിജോ കടുത്ത ലഹരിക്കും മദ്യപാനത്തിനും അടിമയായിരുന്നുവെന്നും മാനസികമായ ചില അസ്വാസ്ഥ്യങ്ങൾ പ്രകടിപ്പിച്ചിരുന്നുവെന്നും നാട്ടുകാർ പറയുന്നു. സഹോദരന്റെ വീട്ടിലും ധ്യാനകേന്ദ്രത്തിലും പോയി മടങ്ങിയെത്തിയതായിരുന്നു റേച്ചൽ. ലിജോ മദ്യലഹരിയിൽ അമ്മയുമായി നിരന്തരം വഴക്കിടാറുണ്ടായിരുന്നതായി അയൽവാസികൾ വ്യക്തമാക്കി.
സംഭവദിവസം ഉച്ചയ്ക്ക് മൂന്ന് മണിയോടെ വീട്ടിൽ നിന്ന് ഇരുവരും തമ്മിൽ വലിയ ബഹളവും തർക്കവും ഉണ്ടായതായി പ്രദേശവാസികൾ അറിയിച്ചു. ഈ തർക്കത്തിനിടെയുണ്ടായ പ്രകോപനത്തിലാണ് റേച്ചലിന് നേരെ ആക്രമണമുണ്ടായതെന്നാണ് പ്രാഥമിക നിഗമനം. തലയ്ക്കേറ്റ ഗുരുതര പരിക്കാണ് മരണകാരണം. വിവരമറിഞ്ഞ് സ്ഥലത്തെത്തിയ പോലീസ് സംഘം ലിജോയെ കസ്റ്റഡിയിലെടുക്കുകയും ഇൻക്വസ്റ്റ് ഉൾപ്പെടെയുള്ള തുടർനടപടികൾ സ്വീകരിക്കുകയും ചെയ്തു. ഈ ആഴ്ചയിൽ തന്നെ സമാനമായ മൂന്ന് കേസുകൾ റിപ്പോർട്ട് ചെയ്യപ്പെട്ടത് ലഹരിയുടെ പിടിയിലമരുന്ന സമൂഹത്തിൽ വലിയ ഞെട്ടലും ആശങ്കയുമാണ് ഉണ്ടാക്കിയിരിക്കുന്നത്.
