വാഷിങ്ടൺ: അമേരിക്കയും ഇറാനും തമ്മിൽ ചർച്ചകൾ പുരോഗമിക്കുകയാണെന്നും ഇരു രാജ്യങ്ങളും തമ്മിലുള്ള സംഘർഷം അവസാനിപ്പിക്കാൻ ധാരണയിലെത്താൻ സാധ്യതയുണ്ടെന്നും അമേരിക്കൻ പ്രസിഡന്റ് ഡൊണാൾഡ് ട്രംപ് പറഞ്ഞു.
വൈറ്റ് ഹൗസിൽ മാധ്യമപ്രവർത്തകരോട് സംസാരിക്കവെയാണ് ട്രംപ് ഇക്കാര്യം അറിയിച്ചത്. ചർച്ചകൾ നല്ല രീതിയിൽ മുന്നോട്ടുപോകുകയാണെന്നും, എന്നാൽ ധാരണയിലെത്താനാകാത്ത സാഹചര്യം ഉണ്ടായാൽ സൈനിക നടപടികൾ വീണ്ടും ആരംഭിക്കേണ്ടിവരുമെന്നും അദ്ദേഹം മുന്നറിയിപ്പ് നൽകി.
അതേസമയം, അമേരിക്കയുമായി നേരിട്ടുള്ള ചർച്ചകൾ ആരംഭിച്ചിട്ടില്ലെന്നാണ് ഇറാൻ വ്യക്തമാക്കിയത്. എന്നാൽ മധ്യസ്ഥ രാജ്യങ്ങളിലൂടെ ആശയവിനിമയം തുടരുകയാണെന്നും ഇറാൻ അറിയിച്ചു.
അമേരിക്ക രണ്ട് ആഴ്ച നീണ്ട വ്യോമാക്രമണം താൽക്കാലികമായി നിർത്തിവെച്ചതിനെ തുടർന്നാണ് നയതന്ത്ര നീക്കങ്ങൾ ശക്തമായത്. എന്നാൽ സൗദി അറേബ്യ, ജോർദാൻ, ഇറാഖ് എന്നിവിടങ്ങളിൽ ഇറാൻ അനുകൂല സായുധസംഘങ്ങളുടെ ഡ്രോൺ ആക്രമണങ്ങൾ റിപ്പോർട്ട് ചെയ്യപ്പെട്ടതോടെ മേഖലയിലെ സംഘർഷാവസ്ഥ തുടരുകയാണ്.
ലോക എണ്ണവ്യാപാരത്തിന് നിർണായകമായ ഹോർമുസ് കടലിടുക്കിലെ ഗതാഗതവും ചർച്ചകളിലെ പ്രധാന വിഷയങ്ങളിലൊന്നാണ്. ഈ മേഖലയിൽ സാധാരണ കപ്പൽഗതാഗതം പുനഃസ്ഥാപിക്കാനുള്ള ശ്രമങ്ങളും ഒമാന്റെ മധ്യസ്ഥതയിൽ പുരോഗമിക്കുന്നതായി റിപ്പോർട്ടുകളുണ്ട്.