കോട്ടയം: പ്രശസ്ത വിനോദസഞ്ചാര കേന്ദ്രമായ ഇലവീഴാപൂഞ്ചിറയിലേക്കുള്ള യാത്രയ്ക്കിടെ ടൂറിസ്റ്റ് വാഹനം തീപിടിച്ച് പൂർണ്ണമായും കത്തിനശിച്ചു. വാഹനത്തിലുണ്ടായിരുന്ന യാത്രക്കാർ തീ പടരുന്നത് കണ്ടയുടൻ പുറത്തിറങ്ങിയതിനാൽ വൻ ദുരന്തം ഒഴിവായി.
ഇന്ന് ഉച്ചയോടെയായിരുന്നു അപകടം. വിനോദസഞ്ചാരികളുമായി മലകയറുന്നതിനിടെ വാഹനത്തിന്റെ മുൻഭാഗത്ത് നിന്ന് പുക ഉയരുന്നത് ഡ്രൈവറുടെ ശ്രദ്ധയിൽപ്പെടുകയായിരുന്നു. ഉടൻ തന്നെ വാഹനം നിർത്തി യാത്രക്കാരോട് പുറത്തിറങ്ങാൻ നിർദ്ദേശിച്ചു. എല്ലാവരും പുറത്തിറങ്ങി നിമിഷങ്ങൾക്കകം തന്നെ വാഹനം ആളിപ്പടർന്നു കത്തുകയായിരുന്നു.
യാത്രക്കാരുടെ സമയബന്ധിതമായ ഇടപെടലും ഡ്രൈവറുടെ മനസ്സാന്നിധ്യവുമാണ് വലിയൊരു അപകടം ഒഴിവാക്കിയത്. ഷോർട്ട് സർക്യൂട്ടാണ് തീപിടുത്തത്തിന് കാരണമെന്നാണ് പ്രാഥമിക നിഗമനം. ഫയർഫോഴ്സ് സ്ഥലത്തെത്തിയാണ് തീയണച്ചത്. വാഹനം പൂർണ്ണമായും ഉപയോഗശൂന്യമായിട്ടുണ്ട്
