ശ്രീനഗർ: ജമ്മു കശ്മീരിലെ ബാരാമുള്ള ജില്ലയിലുള്ള ഉറി സെക്ടറിലെ അതിർത്തി നിയന്ത്രണരേഖയ്ക്ക് സമീപം നടന്ന അപ്രതീക്ഷിത ലാൻഡ്മൈൻ സ്ഫോടനത്തിൽ രണ്ട് ഇന്ത്യൻ സൈനികർക്ക് ഗുരുതരമായി പരിക്കേറ്റു. ഉറി സെക്ടറിലെ കമാൽക്കോട്ട് മേഖലയിലുള്ള മുന്നണി നിരീക്ഷണ പോസ്റ്റിന് സമീപം പതിവ് പട്രോളിംഗും പരിശോധനകളും നടത്തുന്നതിനിടയിലാണ് അപകടമുണ്ടായത്. 8 രാഷ്ട്രീയ റൈഫിൾസിൽ (8 RR) സേവനമനുഷ്ഠിക്കുന്ന ദഫാദാർ വിജയ് കുമാർ (42), നായിക് ശരണപ്പ അങ്കാരി (28) എന്നിവർക്കാണ് പരിക്കേറ്റത്.
സ്ഫോടനം നടന്ന ഉടൻ തന്നെ സൈനികർക്ക് പ്രാഥമിക ചികിത്സ ലഭ്യമാക്കുകയും, തുടർന്ന് വിദഗ്ധ പരിചരണത്തിനായി വ്യോമമാർഗ്ഗം ശ്രീനഗറിലെ ബദാമിൽബാഗിലുള്ള സൈന്യത്തിന്റെ 92 ബേസ് ഹോസ്പിറ്റലിലേക്ക് മാറ്റുകയും ചെയ്തു. പരിക്കേറ്റവരുടെ ആരോഗ്യനില നിലവിൽ അതീവ ജാഗ്രതയോടെ നിരീക്ഷിച്ചു വരികയാണെന്ന് കരസേനാ വൃത്തങ്ങൾ അറിയിച്ചു.
സംഭവം അതിർത്തി കടന്നുള്ള വെടിവെയ്പോ ഭീകരാക്രമണമോ അല്ലെന്നും, പട്രോളിംഗിനിടെ സംഭവിച്ച യാദൃശ്ചികമായ സ്ഫോടനമാണെന്നും സൈനിക ഉദ്യോഗസ്ഥർ വ്യക്തമാക്കി. അപകടത്തിലേക്ക് നയിച്ച സാഹചര്യങ്ങളെക്കുറിച്ചും സുരക്ഷാ മാനദണ്ഡങ്ങളെക്കുറിച്ചും കരസേന വിശദമായ അന്വേഷണം ആരംഭിച്ചിട്ടുണ്ട്. സ്വാതന്ത്ര്യദിനാഘോഷങ്ങളുടെ ഭാഗമായി ജമ്മു കശ്മീരിൽ സുരക്ഷാ ക്രമീകരണങ്ങൾ ശക്തമാക്കിയിരിക്കുന്ന പശ്ചാത്തലത്തിലാണ് ഈ സംഭവം റിപ്പോർട്ട് ചെയ്യപ്പെട്ടിട്ടുള്ളത്.
