ചടയമംഗലം: ഒരു നിമിഷത്തെ അവിവേകത്തിൽ ജീവനൊടുക്കാൻ ശ്രമിച്ച പതിനേഴുകാരിക്ക് സമയോചിതമായ ഇടപെടലിലൂടെയും പ്രഥമശുശ്രൂഷയിലൂടെയും പുതുജീവൻ നൽകി കേരള പോലീസ്. ചടയമംഗലം പോലീസ് സ്റ്റേഷനിലെ സബ് ഇൻസ്പെക്ടർ മനോജ്, ഹോം ഗാർഡ് ജ്യോതി എന്നിവരുടെ കൃത്യമായ രക്ഷാപ്രവർത്തനമാണ് നാടിനാകെ അഭിമാനമായത്.
കഴിഞ്ഞ ദിവസം പുലർച്ചെ നാല് മണിയോടെയാണ് സംഭവങ്ങളുടെ തുടക്കം. ആയൂർ സ്വദേശിനിയായ പെൺകുട്ടിയുടെ അമിത മൊബൈൽ ഫോൺ ഉപയോഗത്തെ അമ്മ വഴക്കുപറഞ്ഞതിനെത്തുടർന്ന് കുട്ടി ആത്മഹത്യാ ഭീഷണി മുഴക്കുകയായിരുന്നു. പരിഭ്രാന്തയായ അമ്മ ഉടൻ തന്നെ ചടയമംഗലം പോലീസ് സ്റ്റേഷനിൽ വിളിച്ച് സഹായം അഭ്യർത്ഥിച്ചു. വിവരം അറിഞ്ഞയുടൻ നൈറ്റ് ഡ്യൂട്ടിയിലുണ്ടായിരുന്ന എസ്.ഐ മനോജും ഹോം ഗാർഡ് ജ്യോതിയും സ്ഥലത്തെത്തി. എന്നാൽ പോലീസ് എത്തുന്നതിന് മുൻപ് തന്നെ പെൺകുട്ടി മുറിക്കുള്ളിൽ കയറി വാതിലടച്ചിരുന്നു.
വാതിൽ തുറക്കാൻ ഉദ്യോഗസ്ഥർ സ്നേഹത്തോടെ ആവശ്യപ്പെട്ടപ്പോൾ തുറക്കാമെന്ന് കുട്ടി അകത്തുനിന്ന് മറുപടി നൽകിയെങ്കിലും, തൊട്ടുപിന്നാലെ മുറിക്കുള്ളിൽ എന്തോ വീഴുന്ന ശബ്ദം കേട്ടു. തുടർന്ന് വിളിച്ചിട്ടും പ്രതികരണമില്ലാതായതോടെ സംശയം തോന്നിയ പോലീസ് സംഘം ഉടൻ തന്നെ ജനൽച്ചില്ല് തകർത്ത് ടോർച്ച് വെളിച്ചത്തിൽ നോക്കിയപ്പോഴാണ് പെൺകുട്ടി ഫാനിൽ ഷാളുപയോഗിച്ച് തൂങ്ങിനിൽക്കുന്നത് കണ്ടത്.
വൈകാതെ തന്നെ മുറിയുടെ വാതിൽ ചവിട്ടിത്തുറന്ന് അകത്തുകടന്ന ഉദ്യോഗസ്ഥർ കുട്ടിയെ താഴെയിറക്കി കിടത്തി. ശ്വാസമറ്റ നിലയിലായിരുന്ന പെൺകുട്ടിക്ക് തളരാതെ തുടർച്ചയായി ഏഴ് മിനിറ്റോളം ഇരുവരും ചേർന്ന് ശാസ്ത്രീയമായ രീതിയിൽ സി.പി.ആർ (CPR) നൽകി. ഇതോടെ കുട്ടി സാവധാനം ശ്വാസമെടുക്കുകയും പ്രതികരിച്ചു തുടങ്ങുകയും ചെയ്തു.
തുടർന്ന് ഒട്ടും സമയം കളയാതെ പോലീസ് ജീപ്പിൽ തന്നെ കുട്ടിയെ അഞ്ചലിലെ സ്വകാര്യ ആശുപത്രിയിൽ എത്തിക്കുകയായിരുന്നു. സമയബന്ധിതമായി വിദഗ്ധ ചികിത്സ ലഭ്യമാക്കിയതോടെ കുട്ടി അപകടനില തരണം ചെയ്തതായി അധികൃതർ അറിയിച്ചു. അതിവേഗത്തിലുള്ള ഇടപെടലിലൂടെ ഒരു കുടുംബത്തിന്റെ കണ്ണീരൊപ്പിയ പോലീസ് ഉദ്യോഗസ്ഥരെ നാട്ടുകാരും ഉന്നത ഉദ്യോഗസ്ഥരും അഭിനന്ദിച്ചു.
