സിഡ്‌നി: ലോകത്തിലെ ഏറ്റവും കർശനമായ പുകയില നിയന്ത്രണ നിയമങ്ങൾ നിലനിൽക്കുന്ന ഓസ്‌ട്രേലിയയിൽ, നിയമവിധേയമായി വിൽക്കുന്ന സിഗരറ്റുകളുടെ ലഭ്യത കൂടുതൽ പരിമിതപ്പെടുത്താൻ നീക്കം. സിഗരറ്റ് വിൽക്കുന്ന റീട്ടെയിൽ വ്യാപാരികളുടെ എണ്ണം ഗണ്യമായി കുറയ്ക്കണമെന്ന് പൊതുജനാരോഗ്യ പ്രവർത്തകർ സർക്കാരിനോട് ആവശ്യപ്പെട്ടു. സിഗരറ്റുകൾ എളുപ്പത്തിൽ വാങ്ങാൻ സാധിക്കുന്നത് ആളുകൾ പുകവലി ഉപേക്ഷിക്കുന്നതിന് തടസ്സമാകുന്നു എന്നാണ് ഇവരുടെ വാദം.
നിലവിൽ ഒരു പാക്കറ്റ് നിയമവിധേയ സിഗരറ്റിന് 40 മുതൽ 50 ഓസ്‌ട്രേലിയൻ ഡോളർ വരെയാണ് (ഏകദേശം 2,200 മുതൽ 2,700 രൂപ വരെ) രാജ്യത്ത് വില വരുന്നത്. എന്നാൽ ഇതേസമയം, രാജ്യത്ത് അനധികൃത പുകയില ഉൽപ്പന്നങ്ങളുടെ വൻ കരിഞ്ചന്ത സജീവമായിക്കൊണ്ടിരിക്കുകയാണ്. നിയമപരമായ സിഗരറ്റുകളെ അപേക്ഷിച്ച് വളരെ തുച്ഛമായ വിലയ്ക്കാണ് ഇത്തരം അനധികൃത ഉൽപ്പന്നങ്ങൾ കരിഞ്ചന്തയിലൂടെ വിറ്റഴിക്കപ്പെടുന്നത്.
അനധികൃത പുകയില, വേപ്പ് വിൽപ്പന തടയുന്നതിനായി ന്യൂ സൗത്ത് വെയിൽസ് ഉൾപ്പെടെയുള്ള പ്രവിശ്യകളിൽ നിയമനടപടികൾ കർശനമാക്കിയിട്ടുണ്ട്. അനധികൃത വിൽപ്പനയ്ക്ക് കൂട്ടുനിൽക്കുന്ന കെട്ടിട ഉടമകൾക്ക് 1,65,000 ഡോളർ വരെ പിഴയും തടവുശിക്ഷയും ഏർപ്പെടുത്താനും കടകൾ അടച്ചുപൂട്ടാനും അധികാരികൾക്ക് അധികാരമുണ്ട്. അതേസമയം, പുകയില ഉൽപ്പന്നങ്ങളുടെ എക്സൈസ് നികുതി കുറയ്ക്കാൻ ഉദ്ദേശിക്കുന്നില്ലെന്ന് ഫെഡറൽ സർക്കാർ വ്യക്തമാക്കി. നിയമപരമായ സിഗരറ്റ് വിൽപ്പന കൂടുതൽ കടുപ്പിക്കുകയാണോ അതോ വൻ ഭീഷണിയാകുന്ന കരിഞ്ചന്തയെ അമർച്ച ചെയ്യുകയാണോ ആദ്യം വേണ്ടതെന്ന ചർച്ചയും ഇതോടെ സജീവമായിട്ടുണ്ട്.
