മെൽബൺ: ഏതാണ്ട് ഒരു നൂറ്റാണ്ടുകാലമായി ലേബർ പാർട്ടി തുടർച്ചയായി വിജയിച്ചുപോരുന്ന മെൽബണിലെ പരമ്പരാഗത ശക്തികേന്ദ്രമായ ഫുട്‌സ്‌ക്രേയിൽ പാർട്ടിയുടെ പിന്തുണയിൽ വൻ ഇടിവ് സംഭവിച്ചതായും, ഒന്നാം മുൻഗണനാ വോട്ടുകളിൽ വൺ നേഷൻ പാർട്ടി ലേബറിനെ മറികടന്നതായും ഞെട്ടിക്കുന്ന സർവ്വേ ഫലം. സെപ്റ്റംബർ 22 മുതൽ ഒക്ടോബർ 1 വരെ ആയിരം വോട്ടർമാർക്കിടയിൽ ഗ്രീൻസ് പാർട്ടി നടത്തിയ സർവ്വേയിലാണ് ഈ അപ്രതീക്ഷിത രാഷ്ട്രീയ മാറ്റം വെളിപ്പെട്ടത്. സർവ്വേ ഫലങ്ങൾ പ്രകാരം വൺ നേഷൻ പാർട്ടി 28.6 ശതമാനം ഒന്നാം മുൻഗണനാ വോട്ടുകളോടെ നേരിയ ഭൂരിപക്ഷത്തിൽ ഒന്നാമതെത്തിയപ്പോൾ, ലേബർ പാർട്ടി 27.5 ശതമാനവുമായി തൊട്ടുപിന്നിലായി.
2022-ലെ വിക്ടോറിയൻ സംസ്ഥാന തിരഞ്ഞെടുപ്പിൽ 43.1 ശതമാനം ഒന്നാം മുൻഗണനാ വോട്ടുകൾ നേടിയ മണ്ഡലത്തിലാണ് ലേബർ പാർട്ടിക്ക് ഈ കനത്ത തിരിച്ചടി നേരിട്ടിരിക്കുന്നത്. വോട്ടെടുപ്പിൽ ഈ പ്രവണത പ്രതിഫലിക്കുകയാണെങ്കിൽ, വെറും നാല് വർഷത്തിനിടയിൽ ലേബർ പാർട്ടിയുടെ ഒന്നാം മുൻഗണനാ വോട്ടുകളിൽ 15.6 ശതമാനത്തിന്റെ കൂപ്പുകുത്തലാണ് സംഭവിക്കുക. സർവ്വേയിൽ ലിബറൽ പാർട്ടിക്ക് 15.1 ശതമാനവും, ഗ്രീൻസിന് 14.9 ശതമാനവും, മറ്റ് പാർട്ടികൾക്കും സ്വതന്ത്രർക്കുമായി ആകെ 13.9 ശതമാനവുമാണ് പിന്തുണ പ്രവചിക്കുന്നത്.
1927-ൽ രൂപീകരിച്ചതു മുതൽ തുടർച്ചയായി 99 വർഷക്കാലം ലേബർ പാർട്ടി മാത്രം ജയിച്ചുവരുന്ന ഫുട്‌സ്‌ക്രേ, മെൽബണിന്റെ പടിഞ്ഞാറൻ മേഖലയിലെ പാർട്ടിയുടെ ഉറച്ച കോട്ടയാണ്. ഫുട്‌സ്‌ക്രേ, മെയ്ഡ്‌സ്റ്റോൺ, മാരിബിർനോങ്, സെഡൺ, വെസ്റ്റ് ഫുട്‌സ്‌ക്രേ, യാരവില്ലിന്റെ ചില ഭാഗങ്ങൾ എന്നിവ ഉൾപ്പെടുന്നതാണ് ഈ മണ്ഡലം. 2018-ൽ ആദ്യമായി തിരഞ്ഞെടുക്കപ്പെട്ട നിലവിലെ ലേബർ എം.പി കാറ്റി ഹാൾ 2022-ൽ 43.1 ശതമാനം വോട്ട് നേടിയ ശേഷം മുൻഗണനാ വോട്ടുകളുടെ ബലത്തിൽ ഗ്രീൻസിനെ പരാജയപ്പെടുത്തുകയായിരുന്നു. അന്ന് 22.4 ശതമാനം വോട്ടോടെ ഗ്രീൻസ് രണ്ടാം സ്ഥാനത്തും, 17.9 ശതമാനത്തോടെ ലിബറലുകൾ മൂന്നാം സ്ഥാനത്തുമാണ് എത്തിയത്. ഗ്രീൻസ്-ലേബർ വൃത്തങ്ങൾ തന്നെയാണ് പുതിയ സർവ്വേ വിവരങ്ങൾ ചോർത്തിയതെങ്കിലും, ഈ സർവ്വേ ഫലത്തെ ഗ്രീൻസ് വക്താവ് തള്ളിപ്പറയുകയും മണ്ഡലത്തിൽ തങ്ങൾക്ക് 30 ശതമാനത്തിലധികം വോട്ടുണ്ടെന്ന് അവകാശപ്പെടുകയും ചെയ്തിട്ടുണ്ട്.
ഫിനാൻഷ്യൽ കൺട്രോളറായ അലക്സാണ്ടർ ലോപ്പസാണ് മണ്ഡലത്തിലെ വൺ നേഷൻ സ്ഥാനാർത്ഥി. ഗതാഗതം-ലോജിസ്റ്റിക്സ്, നിർമ്മാണം, റീസൈക്ലിംഗ്, ഓട്ടോമേഷൻ, കൊമേഴ്സ്യൽ പ്രോപ്പർട്ടി മാനേജ്‌മെന്റ് എന്നീ മേഖലകളിലായി മൂന്ന് പതിറ്റാണ്ടിലേറെ പ്രവർത്തനപരിചയമുള്ള വ്യക്തിയാണ് അദ്ദേഹം. അർജന്റീനയിൽ ജനിച്ച് 1975-ൽ ഓസ്‌ട്രേലിയയിലേക്ക് കുടിയേറിയ ഇദ്ദേഹം, കുടുംബം ഫുട്‌സ്‌ക്രേയിൽ സ്ഥിരതാമസമാക്കിയതോടെ മെൽബണിന്റെ പടിഞ്ഞാറൻ പ്രാന്തപ്രദേശങ്ങളിലാണ് വളർന്നത്. ഹൈഡ് സ്ട്രീറ്റ് പ്രൈമറി സ്കൂളിൽ പഠിച്ച ലോപ്പസ്, മാസ്റ്റേഴ്സ് ഫുട്ബോൾ കളിക്കുന്നതുൾപ്പെടെ പ്രദേശത്തെ സാമൂഹിക പ്രവർത്തനങ്ങളിൽ സജീവ സാന്നിധ്യമാണ്. 99 വർഷത്തെ ചരിത്രത്തിൽ ഒരിക്കൽപ്പോലും പരാജയം രുചിച്ചിട്ടില്ലാത്ത ലേബർ പാർട്ടിക്കാണ് ഈ കണക്കുകൾ ഏറ്റവും വലിയ ആശങ്ക സൃഷ്ടിക്കുന്നത്.
നവംബറിലെ സംസ്ഥാന തിരഞ്ഞെടുപ്പിന് മുന്നോടിയായി വിക്ടോറിയയിലുടനീളം ലേബർ പാർട്ടി നേരിടുന്ന പ്രതിസന്ധിയുടെ പ്രതിഫലനം കൂടിയാണ് ഫുട്‌സ്‌ക്രേയിലെ ആഭ്യന്തര സർവ്വേയും വ്യക്തമാക്കുന്നത്. സെപ്റ്റംബർ 24 മുതൽ 28 വരെ 1,030 വോട്ടർമാർക്കിടയിൽ ഫ്രഷ്‌വാട്ടർ സ്ട്രാറ്റജി നടത്തിയ സർവ്വേയിൽ ലേബർ പാർട്ടിയുടെ സംസ്ഥാനതല ഒന്നാം മുൻഗണനാ വോട്ട് ഓഗസ്റ്റിനെ അപേക്ഷിച്ച് ഒരു പോയിന്റ് കുറഞ്ഞ് 24 ശതമാനത്തിലും, സഖ്യകക്ഷി മുന്നണിയായ കോയലിഷന്റേത് ഒരു പോയിന്റ് കുറഞ്ഞ് 29 ശതമാനത്തിലുമെത്തിയിരുന്നു. വൺ നേഷൻ മാറ്റമില്ലാതെ 22 ശതമാനത്തിലും ഗ്രീൻസ് 14 ശതമാനത്തിലും തുടർന്നു. ടു-പാർട്ടി പ്രിഫേർഡ് (Two-party preferred) കണക്കുകളിൽ കോയലിഷൻ 53-47 എന്ന നിലയിൽ ലേബറിനേക്കാൾ മുന്നിലെത്തുകയും ചെയ്തു. ഇത് 2022-ലെ തിരഞ്ഞെടുപ്പുമായി താരതമ്യം ചെയ്യുമ്പോൾ സർക്കാരിനെതിരായ എട്ട് പോയിന്റിന്റെ ഭരണവിരുദ്ധ വികാരത്തെയാണ് കാണിക്കുന്നത്. കൂടാതെ, മുഖ്യമന്ത്രി സ്ഥാനത്തേക്ക് മുൻഗണന നൽകുന്ന നേതാവായി പ്രതിപക്ഷ നേതാവ് ജെസ് വിൽസൺ 37 ശതമാനം പിന്തുണയോടെ ഒന്നാമതെത്തിയപ്പോൾ, ബെൻ കരോളിന് 30 ശതമാനവും വൺ നേഷൻ വിക്ടോറിയൻ നേതാവ് വാറൻ പിക്കറിംഗിന് 13 ശതമാനവും പിന്തുണയാണ് ലഭിച്ചത്.
