പത്തനംതിട്ട: ശബരിമല മണ്ഡല–മകരവിളക്ക് തീർഥാടനവുമായി ബന്ധപ്പെട്ട് തദ്ദേശ സ്വയംഭരണ വകുപ്പ് മന്ത്രി കെ. എം. ഷാജി പമ്പയിലും നിലയ്ക്കലിലും സന്ദർശനം നടത്തി സ്ഥിതിഗതികൾ വിലയിരുത്തി. തീർഥാടനത്തിന്റെ ഭാഗമായി ആസൂത്രണ സമിതി സെക്രട്ടറിയേറ്റ് കോൺഫറൻസ് ഹാളിൽ ചേർന്ന തദ്ദേശ സ്വയംഭരണ വകുപ്പിന്റെ അവലോകന യോഗത്തിന് ശേഷമായിരുന്നു മന്ത്രിയുടെ സന്ദർശനം.
നിലയ്ക്കൽ പാർക്കിങ് ഗ്രൗണ്ട്, പമ്പയിലെ സ്നാനക്കടവ്, ക്യൂ കോംപ്ലക്സുകൾ, ഗണപതി ക്ഷേത്ര പരിസരം തുടങ്ങിയ വിവിധയിടങ്ങൾ മന്ത്രി നേരിട്ടെത്തി പരിശോധിച്ചു. പമ്പയിൽ തീർഥാടകർ ഉപേക്ഷിച്ചു പോകുന്ന വസ്ത്രങ്ങളും മറ്റ് മാലിന്യങ്ങളും കൃത്യമായി നീക്കം ചെയ്യണമെന്ന് അദ്ദേഹം ദേവസ്വം ബോർഡിന് നിർദേശം നൽകി. പമ്പയിലും നിലയ്ക്കലിലും ശുചിത്വം ഉറപ്പാക്കണമെന്നും മാലിന്യ സംസ്കരണം കാര്യക്ഷമമായി നടപ്പാക്കണമെന്നും മന്ത്രി വ്യക്തമാക്കി.
സി. വി. ശാന്തകുമാർ എം.എൽ.എ, തദ്ദേശ സ്വയംഭരണ വകുപ്പ് പ്രിൻസിപ്പൽ ഡയറക്ടർ ദിവ്യ എസ്. അയ്യർ, വകുപ്പുതല ഉദ്യോഗസ്ഥർ തുടങ്ങിയവരും സന്ദർശനവേളയിൽ മന്ത്രിക്കൊപ്പമുണ്ടായിരുന്നു.
