കോട്ടയം:ഹൃദയത്തിൽ അപൂർവമായി കണ്ടെത്തിയ മുഴ (കാർഡിയാക് ട്യൂമർ) ശസ്ത്രക്രിയയിലൂടെ വിജയകരമായി നീക്കം ചെയ്തതിന് പിന്നാലെ ഗർഭിണിക്ക് സുരക്ഷിത പ്രസവം നടത്തി കോട്ടയം സർക്കാർ മെഡിക്കൽ കോളേജ് ആശുപത്രി. അത്യന്തം സങ്കീർണമായ ചികിത്സയും പ്രസവപരിചരണവും ഏകോപിപ്പിച്ചാണ് അമ്മയുടെയും കുഞ്ഞിന്റെയും ജീവൻ രക്ഷിക്കാനായത്.
ഗർഭകാല പരിശോധനയ്ക്കിടെയാണ് യുവതിയുടെ ഹൃദയത്തിൽ മുഴ കണ്ടെത്തിയത്. ഹൃദ്രോഗ വിദഗ്ധർ, കാർഡിയാക് സർജൻമാർ, അനസ്തീഷ്യ വിഭാഗം, ഗൈനക്കോളജി വിഭാഗം, നവജാത ശിശു വിദഗ്ധർ എന്നിവരടങ്ങിയ ബഹുവിദഗ്ധസംഘം ചികിത്സാ പദ്ധതി തയ്യാറാക്കി. ഗർഭസ്ഥ ശിശുവിന്റെ സുരക്ഷയും അമ്മയുടെ ആരോഗ്യനിലയും ഒരുപോലെ പരിഗണിച്ചാണ് ശസ്ത്രക്രിയ നടത്തിയത്.
ഹൃദയത്തിലെ മുഴ വിജയകരമായി നീക്കം ചെയ്ത ശേഷം ഗർഭകാലം തുടർന്ന യുവതി പിന്നീട് ആരോഗ്യവാനായ കുഞ്ഞിന് ജന്മം നൽകി. അമ്മയും കുഞ്ഞും സുഖമായിരിക്കുന്നതായി ആശുപത്രി അധികൃതർ അറിയിച്ചു.
കോട്ടയം മെഡിക്കൽ കോളേജിൽ നടന്ന ഈ അപൂർവ ചികിത്സാ നേട്ടം സംസ്ഥാന സർക്കാർ മെഡിക്കൽ രംഗത്തെ ശ്രദ്ധേയമായ വിജയങ്ങളിലൊന്നായി വിലയിരുത്തപ്പെടുകയാണ്.