തിരുവനന്തപുരം: പരിസ്ഥിതി സൗഹാർദ്ദ ഓണാഘോഷ സന്ദേശ പ്രചാരണത്തിന്റെ ഭാഗമായി സംസ്ഥാന വ്യാപകമായി ശുചിത്വ മിഷൻ സംഘടിപ്പിക്കുന്ന ‘ഹരിത ഓണം’ ക്യാമ്പയിനോടനുബന്ധിച്ചുള്ള ‘മാവേലി യാത്ര’ വാഹന പര്യടനത്തിന് തുടക്കമായി. തദ്ദേശ സ്വയംഭരണ വകുപ്പ് മന്ത്രി കെ.എം. ഷാജിയും ടൂറിസം വകുപ്പ് മന്ത്രി പി.സി. വിഷ്ണുനാഥും ചേർന്ന് ടൂറിസം വകുപ്പ് ഡയറക്ടറേറ്റ് ഓഫീസ് അങ്കണത്തിൽ വെച്ച് വാഹനം ഫ്ലാഗ് ഓഫ് ചെയ്തു.
പരിസ്ഥിതിക്ക് കോട്ടം തട്ടാത്ത വിധത്തിൽ ആഘോഷങ്ങൾ സംഘടിപ്പിക്കണമെന്ന് സാംസ്കാരിക-ടൂറിസം വകുപ്പ് മന്ത്രി പി.സി. വിഷ്ണുനാഥ് പറഞ്ഞു. ആഘോഷങ്ങൾ കഴിഞ്ഞാലും പരിസ്ഥിതി സൗഹൃദ അന്തരീക്ഷം നിലനിൽക്കണമെന്നതിനാലാണ് ഹരിത ഓണം എന്ന സന്ദേശം ജനങ്ങളിലേക്ക് എത്തിക്കാൻ ശുചിത്വ മിഷൻ ഇത്തരം സംവിധാനം ഒരുക്കിയിരിക്കുന്നതെന്നും മന്ത്രി കൂട്ടിച്ചേർത്തു. ഓണാഘോഷങ്ങൾ പൂർണ്ണമായും പരിസ്ഥിതി സൗഹൃദവും മാലിന്യമുക്തവുമാക്കുന്നതിന്റെ ഭാഗമായി സംസ്ഥാന ശുചിത്വ മിഷന്റെ നിർദ്ദേശാനുസരണം ജില്ലാ ശുചിത്വ മിഷന്റെ നേതൃത്വത്തിലാണ് വിപുലമായ പ്രചാരണ പരിപാടികൾ സംഘടിപ്പിക്കുന്നത്.
അത്യാധുനിക എൽ.ഇ.ഡി. ഡിജിറ്റൽ സ്ക്രീനും ശബ്ദസന്ദേശവും സജ്ജീകരിച്ചിട്ടുള്ള പ്രചാരണ വാഹനം എല്ലാ ജില്ലകളിലും പര്യടനം നടത്തും. ഹരിത ചട്ടങ്ങൾ സംബന്ധിച്ച സന്ദേശങ്ങളും ഹ്രസ്വചിത്രങ്ങളും വാഹനം വഴി പൊതുജനങ്ങളിലേക്ക് എത്തിക്കും. പ്രധാന പൊതുസ്ഥലങ്ങൾ, തദ്ദേശ സ്വയംഭരണ സ്ഥാപനങ്ങൾ, വാണിജ്യ കേന്ദ്രങ്ങൾ എന്നിവിടങ്ങൾ കേന്ദ്രീകരിച്ചാണ് പര്യടനം ക്രമീകരിച്ചിരിക്കുന്നത്. പരമ്പരാഗത വേഷവിധാനങ്ങളോടെയുള്ള മാവേലിയുടെ സാന്നിധ്യവും പ്രചാരണത്തിന് മാറ്റുകൂട്ടും.
ഡിസ്പോസിബിൾ, പ്ലാസ്റ്റിക് ഉത്പന്നങ്ങളുടെ ഉപയോഗം പൂർണ്ണമായി ഒഴിവാക്കാനും പൂക്കളവും ഓണസദ്യയും ഉൾപ്പെടെയുള്ള ആഘോഷങ്ങൾ പ്രകൃതിദത്ത ഉത്പന്നങ്ങൾ മാത്രം ഉപയോഗിച്ച് ഹരിതാഭമാക്കാനും ജില്ലാ ശുചിത്വ മിഷൻ പൊതുജനങ്ങളോട് അഭ്യർത്ഥിച്ചു. ചടങ്ങിൽ ശുചിത്വ മിഷൻ ഡയറക്ടർ ഡോ. ബിനു ഫ്രാൻസിസ്, ഡയറക്ടർ ഓഫ് ഓപ്പറേഷൻസ് ജഹാംഗീർ എം., തദ്ദേശ സ്വയംഭരണ വകുപ്പിലെയും ശുചിത്വ മിഷനിലെയും ഉദ്യോഗസ്ഥർ, വിവിധ ജനപ്രതിനിധികൾ തുടങ്ങിയവർ പങ്കെടുത്തു.
