ന്യൂഡൽഹി: സ്വിസ് പ്രസിഡന്റ് ഗയ് പാർമെലിൻ ഒക്ടോബർ 5 മുതൽ 7 വരെ ഇന്ത്യയിൽ ഔദ്യോഗിക സന്ദർശനം നടത്തും. പ്രധാനമന്ത്രി നരേന്ദ്ര മോദിയുടെ ക്ഷണപ്രകാരമാണ് സന്ദർശനം. ഇക്കൊല്ലം ഫെബ്രുവരിയിൽ എഐ ഇംപാക്ട് ഉച്ചകോടിയിൽ പങ്കെടുക്കാൻ ഇന്ത്യയിലെത്തിയ പാർമെലിന്റെ രണ്ടാമത്തെ ഇന്ത്യാ സന്ദർശനമാണിത്.
ഒക്ടോബർ 5ന് പ്രധാനമന്ത്രി നരേന്ദ്ര മോദിയുമായും രാഷ്ട്രപതി ദ്രൗപദി മുർമുവുമായും പാർമെലിൻ കൂടിക്കാഴ്ച നടത്തും. വ്യാപാരം, നിക്ഷേപം, ശാസ്ത്രം, സാങ്കേതികവിദ്യ, നവീകരണം, കുടിയേറ്റം, സംസ്കാരം തുടങ്ങിയ മേഖലകളിലെ ഉഭയകക്ഷി സഹകരണമാണ് ചർച്ചകളിലെ പ്രധാന വിഷയങ്ങൾ.
ഇന്ത്യയും യൂറോപ്യൻ ഫ്രീ ട്രേഡ് അസോസിയേഷനും (EFTA) തമ്മിലുള്ള വ്യാപാര-സാമ്പത്തിക പങ്കാളിത്ത കരാർ (TEPA) പ്രാബല്യത്തിൽ വന്നതിന്റെ ഒന്നാം വാർഷികവും സന്ദർശനത്തിനിടെ അടയാളപ്പെടുത്തും. സ്വിറ്റ്സർലൻഡ്, നോർവേ, ഐസ്‌ലൻഡ്, ലിച്ചൻസ്റ്റൈൻ എന്നീ രാജ്യങ്ങളാണ് EFTAയിൽ അംഗങ്ങൾ. ഒക്ടോബർ 7ന് രണ്ടാം ഇന്ത്യ-EFTA ‘പ്രോസ്പെരിറ്റി സമ്മിറ്റ്’ നടക്കും.
സർക്കാർ ഉദ്യോഗസ്ഥരും വ്യവസായ-വാണിജ്യ രംഗത്തെ പ്രതിനിധികളും ഉൾപ്പെടുന്ന ഉന്നതതല സംഘവും സ്വിസ് പ്രസിഡന്റിനൊപ്പമുണ്ടാകും. ഒക്ടോബർ 6ന് നോയ്ഡ അന്താരാഷ്ട്ര വിമാനത്താവളവും അദ്ദേഹം സന്ദർശിക്കും.
