ഐച്ചി-നഗോയ: ഏഷ്യൻ ഗെയിംസ് പുരുഷ ഹോക്കിയിൽ നിലവിലെ ചാമ്പ്യന്മാരായ ഇന്ത്യ ഫൈനലിൽ. സെമിഫൈനലിൽ പാകിസ്ഥാനെ 4-3ന് തോൽപ്പിച്ചാണ് ഇന്ത്യ കലാശപ്പോരിന് യോഗ്യത നേടിയത്.
മത്സരത്തിൽ ഇന്ത്യ ആദ്യം 3-0ന് മുന്നിലെത്തിയെങ്കിലും പാകിസ്ഥാൻ തിരിച്ചടിച്ച് സ്കോർ 3-3 എന്ന നിലയിലെത്തിച്ചു. ഹർമൻപ്രീത് സിങ് ഇന്ത്യയ്ക്കായി രണ്ട് ഗോളുകൾ നേടി. സുഖ്ജീത് സിങ്ങാണ് മറ്റൊരു ഗോൾ നേടിയത്. മത്സരം അവസാനിക്കാൻ 49.2 സെക്കൻഡ് മാത്രം ശേഷിക്കെ അഭിഷേക് നേടിയ ഗോളാണ് ഇന്ത്യയുടെ വിജയമുറപ്പിച്ചത്.
മറ്റൊരു സെമിഫൈനലിൽ മലേഷ്യ ദക്ഷിണ കൊറിയയെ 2-1ന് തോൽപ്പിച്ചു. ഇതോടെ ഒക്ടോബർ മൂന്നിന് നടക്കുന്ന ഫൈനലിൽ ഇന്ത്യയും മലേഷ്യയും ഏറ്റുമുട്ടും.
