ന്യൂഡൽഹി: ഡൽഹിയിൽ സ്ത്രീകൾക്കും കുട്ടികൾക്കുമെതിരായ ലൈംഗികാതിക്രമങ്ങൾ തടയാൻ പോലീസ് കൂടുതൽ കർശനവും ഫലപ്രദവുമായ നടപടികൾ സ്വീകരിക്കണമെന്ന് സുപ്രീംകോടതി. കുറ്റകൃത്യം നടന്നശേഷം പ്രതികളെ പിടികൂടുന്നതിന് പകരം കുറ്റകൃത്യങ്ങൾ തടയുന്നതിനാണ് മുൻഗണന നൽകേണ്ടതെന്ന് ജസ്റ്റിസുമാരായ ജെ.ബി. പർദിവാല, കെ. വിനോദ് ചന്ദ്രൻ എന്നിവരടങ്ങിയ ബെഞ്ച് വ്യക്തമാക്കി.
ഡൽഹി-എൻസിആറിൽ സ്ത്രീകൾക്ക്, പ്രത്യേകിച്ച് ചില അപകടസാധ്യതയേറിയ മേഖലകളിൽ, സുരക്ഷിതത്വമില്ലെന്ന തോന്നലുണ്ടെന്ന് കോടതി നിരീക്ഷിച്ചു. രാത്രി 11 മണിയിലും റോഡിലൂടെയോ മെട്രോയിലൂടെയോ യാത്ര ചെയ്യുന്ന സ്ത്രീകൾക്ക് സുരക്ഷിതമായി സഞ്ചരിക്കാനാകുന്ന സാഹചര്യം ഉറപ്പാക്കണമെന്നും കോടതി പറഞ്ഞു. കുറ്റകൃത്യങ്ങൾക്ക് സാധ്യതയുള്ളവരുടെ മനസിൽ നിയമത്തിന്റെ ശക്തിയെക്കുറിച്ചുള്ള ഭയം സൃഷ്ടിക്കുന്ന തരത്തിൽ പോലീസ് പ്രവർത്തിക്കണമെന്നും നിർദേശിച്ചു.
ബസ് സ്റ്റാൻഡുകൾ, റെയിൽവേ-മെട്രോ സ്റ്റേഷനുകൾ, പാർക്കുകൾ, സ്കൂളുകൾ, കോളജുകൾ തുടങ്ങിയ പൊതുസ്ഥലങ്ങളിൽ നിരീക്ഷണവും പട്രോളിങ്ങും ശക്തമാക്കണം. സിസിടിവി സംവിധാനങ്ങൾ സ്ഥാപിച്ചാൽ മാത്രം പോരെന്നും അവ തുടർച്ചയായി നിരീക്ഷിക്കുന്ന സംവിധാനവും കാര്യക്ഷമമാക്കണമെന്നും കോടതി ചൂണ്ടിക്കാട്ടി. വെളിച്ചക്കുറവുള്ളതും സുരക്ഷാ സംവിധാനങ്ങൾ അപര്യാപ്തവുമായ മേഖലകളിൽ പ്രത്യേക ശ്രദ്ധ നൽകണമെന്നും നിർദേശിച്ചു.
ഡൽഹി-എൻസിആറിൽ അടുത്തിടെ റിപ്പോർട്ട് ചെയ്ത ബലാത്സംഗ, ലൈംഗികാതിക്രമ സംഭവങ്ങളെ തുടർന്ന് സുപ്രീംകോടതി സ്വമേധയാ ആരംഭിച്ച കേസിലാണ് പരാമർശങ്ങൾ. സെപ്റ്റംബർ 28ലെ ഉത്തരവിൽ പൊതുസ്ഥലങ്ങളിലെ സുരക്ഷാ സംവിധാനങ്ങളുടെ പ്രവർത്തനം പരിശോധിക്കാൻ കോടതി നിർദേശിച്ചിരുന്നു. അപകടസാധ്യതയുള്ള മേഖലകളുടെ മാപ്പിങ്, സിസിടിവി-തെരുവുവിളക്ക് സംവിധാനങ്ങളുടെ പരിശോധന, സുരക്ഷാ പദ്ധതികളുടെ യഥാർഥ പ്രവർത്തനം എന്നിവ സംബന്ധിച്ച് റിപ്പോർട്ട് നൽകാനും ഡൽഹി പോലീസിനോട് ആവശ്യപ്പെട്ടിട്ടുണ്ട്.
കേസിൽ വിശദമായ ഉത്തരവ് പുറപ്പെടുവിക്കുമെന്നും സുപ്രീംകോടതി വ്യക്തമാക്കി. അടുത്ത വാദം നവംബർ 16ന് പരിഗണിക്കാനായി മാറ്റി.
