മെൽബൺ: മെൽബൺ വിമാനത്താവളത്തിലെ ടെർമിനലുകൾ 1, 2, 3 എന്നിവയിലെ പിക്കപ്പ്, ഡ്രോപ്പ്-ഓഫ് സംവിധാനങ്ങളിൽ മാറ്റം വരുത്തിക്കൊണ്ട് പുതിയ ‘ടി123 ട്രാൻസ്‌പോർട്ട് ഹബ്’ ഒക്ടോബർ 6 ചൊവ്വാഴ്ച മുതൽ പ്രവർത്തനസജ്ജമായി. ക്വാണ്ടാസ് ആഭ്യന്തര സർവീസുകൾ നടത്തുന്ന ടെർമിനൽ 1, അന്താരാഷ്ട്ര സർവീസുകൾക്കുള്ള ടെർമിനൽ 2, വിർജിൻ ഓസ്‌ട്രേലിയ സർവീസുകൾക്കുള്ള ടെർമിനൽ 3 എന്നിവിടങ്ങളിലേക്ക് എത്തുന്ന യാത്രക്കാരെ ഇനിമുതൽ ടെർമിനലുകൾക്ക് മുന്നിൽ നേരിട്ട് ഇറക്കാനോ കാത്തുനിന്ന് കയറ്റാനോ സാധിക്കില്ല. പകരം പുതുതായി സജ്ജീകരിച്ച ടി123 ട്രാൻസ്‌പോർട്ട് ഹബ്ബ് വഴിയാണ് ഈ സേവനങ്ങൾ ക്രമീകരിച്ചിരിക്കുന്നത്.
പുതിയ ക്രമീകരണമനുസരിച്ച് യാത്രക്കാരെ ഇറക്കേണ്ട ഡ്രോപ്പ്-ഓഫ് ഏരിയ ഹബ്ബിന്റെ ലെവൽ 3-ലാണ് ഒരുക്കിയിരിക്കുന്നത്. ഇവിടെ 74 വാഹനങ്ങൾക്ക് സൗകര്യമുണ്ടാകും. ഈ സേവനം തികച്ചും സൗജന്യമാണ്. അതേസമയം, യാത്രക്കാരെ കൂട്ടിക്കൊണ്ടുപോകേണ്ട പിക്കപ്പ് ഏരിയ ഹബ്ബിന്റെ ലെവൽ 2-ലാണ് ക്രമീകരിച്ചിരിക്കുന്നത്. 115 വാഹനങ്ങൾക്ക് പാർക്ക് ചെയ്യാൻ ഇടമുള്ള ഈ മേഖലയിൽ ആദ്യ അഞ്ച് മിനിറ്റ് സേവനം സൗജന്യമായിരിക്കും.
വിമാനത്താവളത്തിലേക്ക് എത്തുന്ന വാഹനങ്ങൾ ടുല്ലാമരിൻ ഫ്രീവേയിൽ (Tullamarine Freeway) നിന്ന് എക്സിറ്റ് 19 വഴി നാം വേ (Naarm Way) പ്രവേശിച്ച് ‘T123 Pick-up / Drop-off’ ബോർഡുകൾ പിന്തുടരേണ്ടതാണ്. വിമാനങ്ങൾ വൈകുകയോ യാത്രക്കാർ എത്താൻ സമയമെടുക്കുകയോ ചെയ്യുന്ന സാഹചര്യങ്ങളിൽ ടെർമിനലുകൾക്ക് ചുറ്റും കറങ്ങുന്നത് ഒഴിവാക്കാൻ മേഴ്സർ ഡ്രൈവിലുള്ള (Mercer Drive) ‘ഫ്രീ വെയ്റ്റ് സോൺ’ ഉപയോഗിക്കാവുന്നതാണ്. ഇവിടെ ആദ്യ 60 മിനിറ്റ് സൗജന്യ പാർക്കിങ് അനുവദിക്കും. യാത്രക്കാർ എത്തിക്കഴിഞ്ഞാൽ ഇവിടെ നിന്ന് പിക്കപ്പ് ഏരിയയിലേക്ക് നീങ്ങാം.
അതേസമയം, ജെറ്റ്സ്റ്റാർ, റെക്സ് സർവീസുകൾ പ്രവർത്തിക്കുന്ന ടെർമിനൽ 4-ലെ പിക്കപ്പ്, ഡ്രോപ്പ്-ഓഫ് സംവിധാനങ്ങളിൽ യാതൊരു മാറ്റവുമില്ലാതെ മുൻപത്തെപ്പോലെ തന്നെ തുടരും. പുതിയ ട്രാൻസ്‌പോർട്ട് ഹബ്ബിൽ നിന്ന് ടെർമിനലുകളിലേക്ക് നടക്കാൻ ബുദ്ധിമുട്ടുള്ള യാത്രക്കാർക്കായി ബഗ്ഗികളും വീൽചെയർ സൗകര്യങ്ങളും ഉൾപ്പെടുന്ന ‘മെൽബൺ എയർപോർട്ട് അസിസ്റ്റ്’ സൗജന്യ സേവനവും ലഭ്യമാണ്. പുതിയ ക്രമീകരണങ്ങൾ നിലവിൽ വന്നതിനാൽ, യാത്രക്കാരെ എത്തിക്കാനും സ്വീകരിക്കാനും എത്തുന്നവർ പുതിയ ദിശാബോർഡുകൾ ശ്രദ്ധിക്കണമെന്നും അധികസമയം കരുതി യാത്ര തിരിക്കണമെന്നും അധികൃതർ നിർദ്ദേശിച്ചു.
