വാഷിംഗ്ടൺ: ദുബായിൽ നിന്ന് ടെൽ അവീവിലേക്ക് പറന്ന ഫ്ലൈദുബായ് വിമാനം തകർക്കാൻ ശ്രമിച്ച സഹപൈലറ്റിന്റെ അക്രമത്തെ ധീരമായി ചെറുത്ത് 174 യാത്രക്കാരുടെ ജീവൻ രക്ഷിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിന് യു.എസ് പ്രസിഡന്റ് ഡൊണാൾഡ് ട്രംപിന്റെ ആദരം. സഹപൈലറ്റ് വിമാനം അപകടപ്പെടുത്താൻ ശ്രമിച്ചപ്പോൾ ഗുരുതരമായി പരിക്കേറ്റിട്ടും മച്ചാർ കാണിച്ച മനസ്സാന്നിധ്യമാണ് വൻ ദുരന്തം ഒഴിവാക്കിയതെന്ന് ട്രംപ് വ്യക്തമാക്കി. അക്രമിയായ സഹപൈലറ്റ് ഒരു ഭീകരനോ കടുത്ത മാനസികവൈകല്യമുള്ള ആളോ ആകാം എന്ന് അദ്ദേഹം മാധ്യമങ്ങളോട് പ്രതികരിച്ചു.
പറക്കലിനിടെ വിമാനം പെട്ടെന്ന് താഴേക്ക് പതിക്കാൻ തുടങ്ങിയതോടെ വിമാനത്തിനുള്ളിൽ വലിയ പരിഭ്രാന്തിയാണുണ്ടായത്. കുത്തേറ്റ ഗുരുതര പരിക്കുകളോടെ രക്തത്തിൽ കുളിച്ചുനിൽക്കുമ്പോഴും സ്മിത് മച്ചാർ കോക്പിറ്റിന്റെ വാതിൽ തുറന്നുകൊടുത്തതാണ് രക്ഷാപ്രവർത്തനത്തിൽ നിർണായകമായതെന്ന് ട്രംപ് ചൂണ്ടിക്കാട്ടി. വാതിൽ തുറന്നയുടൻ ഇസ്രായേൽ പൗരനായ യാത്രക്കാരനും ക്യാബിൻ ക്രൂ അംഗങ്ങളും ഉള്ളിലേക്ക് കടന്ന് അക്രമിയെ കീഴ്പ്പെടുത്തുകയും വിമാനത്തിന്റെ നിയന്ത്രണം വീണ്ടെടുക്കുകയുമായിരുന്നു.
സംഭവത്തെക്കുറിച്ച് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവുമായി താൻ സംസാരിച്ചതായും ട്രംപ് അറിയിച്ചു. നിയന്ത്രണം തിരികെ പിടിച്ച വിമാനം സൗദി അറേബ്യയിലെ തബൂക്ക് വിമാനത്താവളത്തിൽ സുരക്ഷിതമായി ലാൻഡ് ചെയ്യുകയായിരുന്നു. പരിക്കേറ്റ ക്യാപ്റ്റൻ സ്മിത് മച്ചാർ സൗദിയിലെ ആശുപത്രിയിൽ ചികിത്സയിലാണ്. കസ്റ്റഡിയിലായ അക്രമിയായ സഹപൈലറ്റിനെ അന്വേഷണ ഏജൻസികൾ ചോദ്യം ചെയ്തുവരികയാണ്.
