മെൽബൺ: വ്യക്തിഗത സുരക്ഷയ്ക്കായി പെപ്പർ സ്പ്രേ ഉപയോഗിക്കുന്നത് നിയമവിധേയമാക്കുമെന്നതടക്കമുള്ള പ്രഖ്യാപനങ്ങളുമായി വിക്ടോറിയൻ തെരഞ്ഞെടുപ്പിൽ വൺ നേഷൻ പാർട്ടി പ്രചാരണം ആരംഭിച്ചു. ക്രൗൺ കാസിനോയിൽ നടന്ന ഔദ്യോഗിക ചടങ്ങിൽ അപ്പർ ഹൗസിലേക്കും 88 ലോവർ ഹൗസ് മണ്ഡലങ്ങളിലേക്കുമുള്ള സ്ഥാനാർത്ഥികളെ പാർട്ടി പ്രഖ്യാപിച്ചു.
തദ്ദേശീയ ഗോത്രവർഗ്ഗക്കാരുമായുള്ള സംസ്ഥാനത്തിന്റെ കരാർ റദ്ദാക്കുക, പ്രാദേശിക വിക്ടോറിയയിലെ പേറോൾ നികുതി പൂർണ്ണമായും ഒഴിവാക്കുക, ചെറുകിട ബിസിനസുകൾ ആരംഭിക്കുന്നത് ചെലവുകുറഞ്ഞതാക്കുക തുടങ്ങിയവയാണ് പാർട്ടിയുടെ പ്രധാന വാഗ്ദാനങ്ങൾ. ഗുണ്ടാസംഘങ്ങളെ അടിച്ചമർത്തുന്നതിനും ക്രമസമാധാനപാലനത്തിനും ജാമ്യവ്യവസ്ഥകൾ കർശനമാക്കുന്നതിനുമാണ് പ്രഥമ പരിഗണനയെന്ന് സംസ്ഥാന പ്രസിഡന്റ് വാറൻ പിക്കറിംഗ് വ്യക്തമാക്കി.
അതേസമയം, വൺ നേഷൻ അധികാരത്തിലെത്തിയാൽ മുൻ പ്രീമിയർമാരായ ഡാനിയൽ ആൻഡ്രൂസും ജസിന്ത അലനും ക്രിസ്മസിന് മുമ്പ് ജയിലിലാകുമെന്ന് പാർട്ടി നേതാവ് മാർക്ക് നിക്കോൾസൺ പ്രസംഗത്തിൽ അവകാശപ്പെട്ടു. എ.ബി.സി, ദി ഗാർഡിയൻ, ദി ഏജ് തുടങ്ങിയ പ്രമുഖ മാധ്യമങ്ങളെ പരിപാടിയിൽ പങ്കെടുക്കുന്നതിൽ നിന്ന് പാർട്ടി വിലക്കിയിരുന്നു. മുൻ ലിബറൽ പാർട്ടി നേതാവ്, പാരാസിറ്റമോൾ ഓട്ടിസത്തിന് കാരണമാകുമെന്ന അടിസ്ഥാനരഹിതമായ വാദത്തെ പിന്തുണച്ച പ്രകൃതിചികിത്സകൻ, മദ്യപിച്ച് വാഹനമോടിച്ച് ലൈസൻസ് റദ്ദായ മുൻ കൗൺസിലർ തുടങ്ങിയ വിവാദ വ്യക്തിത്വങ്ങൾ ഉൾപ്പെടുന്നതാണ് പാർട്ടിയുടെ സ്ഥാനാർത്ഥിപ്പട്ടിക.
