മെൽബൺ: മെൽബണിലെ ഒരേ പെറ്റിംഗ് മൃഗശാല (Petting zoo) സന്ദർശിച്ചതിന് പിന്നാലെ ഗുരുതര ബാക്ടീരിയൽ അണുബാധയെത്തുടർന്ന് രണ്ട് കുട്ടികളെ ആശുപത്രിയിൽ പ്രവേശിപ്പിച്ചു. ഇതിൽ മൂന്ന് വയസ്സുള്ള ഒരു കുട്ടി നാലാഴ്ചയോളം തീവ്രപരിചരണ വിഭാഗത്തിൽ (ICU) കഴിയുകയും സ്ഥിരമായ മസ്തിഷ്ക ക്ഷതം (brain damage) സംഭവിക്കുകയും ചെയ്തു. ഈ കുട്ടിക്ക് വൃക്ക മാറ്റിവെക്കൽ ശസ്ത്രക്രിയ ആവശ്യമായി വരുമോ എന്ന കാര്യം ഡോക്ടർമാർ പരിശോധിച്ച് വരികയാണ്. മേയ് മാസത്തിൽ ഇതേ ഫാം സന്ദർശിച്ച ശേഷം ഗുരുതരാവസ്ഥയിലായ രണ്ട് വയസ്സുള്ള മറ്റൊരു കുട്ടി 17 ദിവസത്തോളം ഡയാലിസിസിന് വിധേയനായതായി റിപ്പോർട്ട് ചെയ്തു.
വിക്ടോറിയയിൽ ഷിഗ ടോക്സിൻ ഉത്പാദിപ്പിക്കുന്ന ഇ-കോളി (STEC – Shiga toxin-producing E. coli) അണുബാധകൾ വർദ്ധിച്ചുവരുന്ന പശ്ചാത്തലത്തിലാണ് ഈ സംഭവങ്ങൾ റിപ്പോർട്ട് ചെയ്യപ്പെട്ടിട്ടുള്ളത്. ഈ വർഷം ഇതുവരെ 160-ലധികം കേസുകളാണ് ഇവിടെ സ്ഥിരീകരിച്ചത്. ഈ ബാക്ടീരിയ ഹീമോലിറ്റിക് യുറേമിക് സിൻഡ്രോം (HUS) എന്ന അപൂർവ്വവും ജീവന് തന്നെ ഭീഷണിയായതുമായ അവസ്ഥയ്ക്ക് കാരണമാകും. ഇത് വൃക്കകളുടെ പ്രവർത്തനം പെട്ടെന്ന് നിലയ്ക്കുന്നതിലേക്ക് നയിച്ചേക്കാം. മൃഗങ്ങളുടെ ദഹനനാളത്തിൽ കാണപ്പെടുന്ന എസ്ടിഇസി ബാക്ടീരിയ അവയുടെ വിസർജ്യവുമായുള്ള സമ്പർക്കത്തിലൂടെയാണ് മനുഷ്യരിലേക്ക് പടരുന്നത്. രക്തം കലർന്ന വയറിളക്കം, കഠിനമായ വയറുവേദന, ഓക്കാനം, ഛർദ്ദി എന്നിവയാണ് പ്രധാന ലക്ഷണങ്ങൾ.
മെയ് മാസത്തിൽ പെറ്റിംഗ് ഫാം സന്ദർശിച്ചതിന് പിന്നാലെയാണ് തന്റെ രണ്ട് വയസ്സുള്ള മകന് കടുത്ത ഛർദ്ദിയും വയറിളക്കവും ഉണ്ടായതെന്നും തുടക്കത്തിൽ സാധാരണ ഗ്യാസ്ട്രോ എൻട്രൈറ്റിസ് ആണെന്നാണ് കരുതിയതെന്നും ഒരു അമ്മ വെളിപ്പെടുത്തി. വിസർജ്യത്തിൽ രക്തം കണ്ടതിനെത്തുടർന്ന് കുട്ടിയെ ഫ്രാങ്ക്സ്റ്റൺ ആശുപത്രിയിൽ പ്രവേശിപ്പിക്കുകയും രക്തപരിശോധനയിൽ എച്ച്.യു.എസ്. (HUS) ആണെന്ന് സ്ഥിരീകരിക്കുകയുമായിരുന്നു. കുട്ടിക്ക് 17 ദിവസത്തെ ഡയാലിസിസും രണ്ട് തവണ രക്തപ്പകർച്ചയും ആവശ്യമായി വന്നെങ്കിലും പിന്നീട് രോഗമുക്തി നേടി. എന്നാൽ മൂന്ന് വയസ്സുള്ള രണ്ടാമത്തെ കുട്ടിയുടെ നില ഇപ്പോഴും ഗുരുതരമായി തുടരുകയാണ്. ഇത്തരം രോഗസാധ്യതകളെക്കുറിച്ച് സന്ദർശകർക്ക് കൂടുതൽ വ്യക്തമായ വിവരങ്ങളും മുന്നറിയിപ്പുകളും നൽകാൻ ഇത്തരം ഫാമുകൾ തയ്യാറാകണമെന്ന് കുട്ടിയുടെ അമ്മ ആവശ്യപ്പെട്ടു.
സംഭവത്തെ തുടർന്ന് കൂടുതൽ ഹാൻഡ്വാഷിംഗ് സൗകര്യങ്ങൾ ഒരുക്കാനും അണുബാധ സാധ്യതകളെക്കുറിച്ചുള്ള മുന്നറിയിപ്പ് ബോർഡുകൾ സ്ഥാപിക്കാനും വിക്ടോറിയൻ ആരോഗ്യ വകുപ്പ് ഫാം അധികൃതർക്ക് നിർദ്ദേശം നൽകി. റിപ്പോർട്ട് ചെയ്യപ്പെടുന്ന എല്ലാ എച്ച്.യു.എസ്. കേസുകളിലും അണുബാധയുടെ ഉറവിടം കണ്ടെത്താനും തുടർബാധകൾ തടയാനുമായി വകുപ്പ് സമഗ്രമായ അന്വേഷണം നടത്തുന്നുണ്ടെന്ന് ഡെപ്യൂട്ടി ചീഫ് ഹെൽത്ത് ഓഫീസർ ഡോ. ക്ലെയർ ലൂക്കർ വ്യക്തമാക്കി. കുട്ടികളിലും പ്രതിരോധശേഷി കുറഞ്ഞവരിലും ഇത്തരം അണുബാധകൾ ഗുരുതരമായ ആരോഗ്യപ്രശ്നങ്ങൾ സൃഷ്ടിക്കുമെന്നും അദ്ദേഹം മുന്നറിയിപ്പ് നൽകി. സമാനമായ രീതിയിൽ 2014-ൽ തെക്കൻ സിഡ്നിയിലെ ഒരു കബാബ് കടയിൽ നിന്നും അഞ്ചുപേർക്ക് എസ്ടിഇസി ബാക്ടീരിയ ബാധ റിപ്പോർട്ട് ചെയ്തിരുന്നു. തുടർന്ന് ഭക്ഷ്യസുരക്ഷാ വീഴ്ചകൾ കണ്ടെത്തിയതിനെത്തുടർന്ന് സ്ഥാപനം താൽക്കാലികമായി അടച്ചുപൂട്ടിയിരുന്നു.
